आइसिसी विश्वकप लिग-२ अन्तर्गत स्कटल्यान्डमा जारी नेपाल, नेदरल्यान्ड्स र स्कटल्यान्डबीचको त्रिकोणात्मक सिरिजमा तेस्रो खेलमा नेपाल पराजित भएको छ।
नेपाललाई आइतबार स्कटल्यान्डको डन्डीमा भएको रोमाञ्चक खेलमा घरेलु टोलीले २ रनको झिनो अन्तरले पराजित गर्यो।
स्कटल्यान्डले दिएको ३२४ रनको लक्ष्य पछ्याएको नेपाल ५० ओभरमा ३२१ रनमा अलआउट हुन पुग्यो। नेपालका लागि भीम सार्की, दीपेन्द्रसिंह ऐरी र सोमपाल कामीले अर्धशतक प्रहार गरे पनि त्यो जितका लागि पर्याप्त हुन सकेन।
नेपालको सुरूवात भने राम्रो हुन सकेन। ओपनर कुशल भुर्तेल चौथो ओभरमा १७ रनमा रनआउट भए। उनले रनआउट हुनुअघि २० बलमा ३ चौका प्रहार गरेका थिए। अर्को ओभरमा अर्का ओपनर आसिफ शेख ८ रनमा बोल्ड हुन पुगे। आठौं ओभरमा कप्तान रोहितकुमार पौडेल ९ बल खेल्दा केबल ३ रनमा आउट भए।
त्यसपछि आरिफ शेख र भीम सार्कीले नेपालको इनिङ्ग्स साम्हाले। आरिफ र भीमबीच चौथो विकेटका लागि ९४ रनको साझेदारी भयो। आरिफले ५५ बलमा ५ चौकाको मद्दतमा ३९ रन जोडे। भीम सार्कीले जिम्मेवारीपूर्ण ब्याटिङ गर्ने क्रममा ७३ रनको योगदान गरे। उनले ८५ बलमा ८ चौका प्रहार गरे।
त्यसपछि गुल्सन झाले १३ बलमा ११ रन जोडेर आउट हुन पुगे। दबाब बढिरहेको बेमला नेपालका लागि दीपेन्द्रसिंह ऐरी र सोमपाल कामीले सातौं विकेट लागि १०५ रनको साझेदारी गरेपछि नेपालको आसा बढेको थियो। दुवैले अर्धशतक प्रहार गर्दा नेपाली टोलीमा उत्साह बढेको थियो। तर दिपेन्द्र ४७ ओभरको तेस्रो बलमा आउट हुन पुगे। उनले ५१ बलमा ५६ रन जोड्ने क्रममा २ चौका हिर्काए। दीपेन्द्रले ४८ रन त कुदेर जोडेका थिए।
सोमपाल कामीले ४४ बलमा ६७ रन जोडे। ४८औं ओभरको अन्तिम बलमा आउट हुनु पुगेका उनले ३ चौका र ४ छक्का प्रहार गरेका थिए। उनी आउट हुँदा नेपाललाई अन्तिम दुई ओभरमा १६ रन चाहिएको थियो भने ब्याटिङमा करण केसी र सन्दीप लामिछाने थिए।
४९औं ओभरमा करण केसी र सन्दीप लामिछाने मिलेर ९ रन जोडे। जसका कारण नेपाललाई अन्तिम ओभरमा ७ रन चाहिएको थियो। जसमा करण केसीले स्कटल्यान्डका सफायन सरिफको पहिलो बलमा दुई रन लिए। तर दोस्रो बल डट भयो। तेस्रो बलमा करण केसी आउट हुन पुगे। उनले १० बलमा १ चौका र १ छक्काको मद्दतमा १७ रन जोडे। त्यसपछि नेपाललाई ३ बलमा ५ रन चाहियो। चौथो बलमा ललित राजवंशीले बललाई ब्याटमा नछोए पनि सन्दीपको राम्रो कलमा एक रन लिए। पाँचौ बलमा सन्दीपले एक रन मात्र लिन सके भने अन्तिम बलमा तीन रन चाहिएको बेला ललित बोल्ड हुन पुग्दा नेपाल अलआउट हुनुका साथै पराजित भयो।
बलिङमा स्कटल्यान्डका जोन्सले ३ विकेट लिए भने शरिफ र माइकल लिस्कले २-२ विकेट लिए।
टस जितेर पहिले ब्याटिङ गरेको घरेलु टोलीले ६ विकेटको क्षतिमा ३२३ रन बनायो।
डन्डीमा घरेलु टोलीका लागि कप्तान रिची बेरिङटन र माइकल लिस्कले उत्कृष्ट ब्याटिङ गरे। उनीहरुबीच छैटौं विकेटका लागि १२५ रनको साझेदारी हुँदा स्कटल्यान्ड ३ सय रनतर्फ अघि बढेको थियो।
बेरिङटनले शतक प्रहार गरे। उनी १०२ रन बनाएर रनआउट भएका थिए। उनले ११४ बल खेलेर ६ चौका र ४ छक्का प्रहार गरे। उनलाई ४८औं ओभरमा दुई रन लिने क्रममा गुल्सन झाको थ्रोमा आसिफ शेखले रनआउट गरे।
लिस्कले नटआउट ९६ रन बनाउने क्रममा ६२ बलमा १२ चौका र ३ छक्का प्रहार गरे।
अन्तिम ओभरमा करण केसीलाई लगातार तीन छक्का प्रहार गरेका मार्क वाटले ९ बलमा नटआउट २१ रन बनाए।
त्यसअघि ओपनर जर्ज मुन्सी शून्य र ब्रेन्डन मक्मेलन ५ रनमा आउट भए। दुवैलाई नेपालका करण केसीले पहिलो पावरप्लेको ६ ओभरभित्र आउट गरेका थिए।
ओपनिङ ब्याटर चार्ली टियर ६८ रन बनाएर खेलिरहदा ललितनारायण राजवंशीबाट बोल्ड भएका थिए। दीपेन्द्रसिंह ऐरीले फिनले म्याकक्रेथलाई १७ रन र म्याथ्यु क्रसलाई ३ रनमा आउट गरे। दीपेन्द्रले फिनलेलाई उत्कृष्ट कट एन्ड बउल्ड गरेका थिए।
बलिङमा नेपालका करण केसी र दीपेन्द्रसिंह ऐरीले २-२ विकेट लिए। करणले २ मेडन राखे पनि ९ ओभरमा ७४ रन खर्चिए। दीपेन्द्रले ७ ओभरमा ३७ रन दिए।
ललित राजंवशीले १० ओभरमा १ विकेट लिँदा ४१ रन खर्चिए।
सन्दीप लामिछाने भने चल्न सकेनन्। उनले १० ओभर बलिङ गर्दा कुनै विकेट लिन सकेनन्। खेलमा सन्दीपले ६९ रन खर्चिँदा ५ चौका र ३ छक्का दिएका थिए। मध्य ओभरमा उनी महँगो सावित हुँदा स्कटल्यान्डको रनले गति लिएको थियो।
विकेट लिन नसकेका सोमपाल कामी सबैभन्दा महँगो सावित भए। उनले ९ ओभरमा ७५ रन खर्चिए।
सिरिजका यसअघिका सुरुवाती खेलमा नेपाल विजयी भएको थियो। नेपालले स्कटल्यान्डविरूद्ध पहिलो खेलमा १ विकेटको रोमाञ्जक जित हासिल गरेको थियो। स्कटल्यान्डलाई पराजित गरेपछि नेदरल्याण्डविरूद्धको खेलमा पनि नेपाल ५ विकेटले विजयी भएको थियो।
नेपालले सिरिजको अन्तिम खेल पुनः नेदरल्याण्डसँग आगामी बिहीबार खेल्नेछ।
लिग-२ को अंक तालिकामा नेपाल १० अंकसहित सातौं स्थानमा छ। नेपालले अहिलेसम्म १५ खेल खेलेको छ। १६ खेल खेलेको युएई ६ अंकसहित पुछारमा छ।
शीर्षस्थानको अमेरिकाले २० खेलबाट २८ अंक बनाएको छ। दोस्रो स्थानमा नेदरल्यान्ड्स छ। उसले २२ खेलबाट २६ अंक जोडेको छ।
त्यस्तै तेस्रो स्थानको स्कटल्यान्डको १९ खेलबाट २४ अंक छ। चौथो ओमानले २० खेलबाट २४ अंक र पाँचौं स्थानको क्यानडाले २० खेलबाट २० अंक जोडेको छ।
नेपालभन्दा एक स्थान माथि रहेको नामिबियाले २० खेलबाट १४ अंक जोडेको छ।
