आइपिएल २०२५ अन्तर्गत शीर्ष स्थानको गुजरात टाइटन्स पराजित भएको छ। आइतबार भएको खेलमा गुजरातलाई पुछारमा रहेको चेन्नई सुपरकिंग्सले ८३ रनले पराजित गरेको हो।
पराजयसँगै प्लेअफमा पुगिसकेको गुजरातको शीर्ष दुईमा पर्ने सम्भवना अनिश्चित भएको छ। गुजरातलाई दोस्रो स्थानको पञ्जाब किंग्स, रोयल च्यालेन्जर्स बेंगलुरु र मुम्बई इन्डियन्सले पछि पार्ने सम्भावना छ। अन्तिम खेलसँगै गुजरातको १८ अंक छ भने पञ्जाब र बेंगलुरुको १७-१७ अंक र मुम्बईको १६ अंक रहेको छ।
पहिले ब्याटिङ गरेको चेन्नईले ५ विकेटको क्षतिमा २३० रन जोड्यो। डेवन कनवेले ५२ रन र डेवाल्ड ब्रेविसले ५७ रन बनाए।
२३१ रनको लक्ष्य पछ्याएको गुजरात १८.३ ओभरमा १४७ रनमा अलआउट भयो। उसका लागि ओपनर साइ सुदर्शनले ४१ रन बनाए अरु ब्याटर सस्तैमा आउट भए।
पाँचौ ओभरमा तीन विकेट गुमाउँदा ३० रन जोडेको थियो।
बलिङमा चेन्नईका नूर अहमद र अन्शुल कम्बोजले ३-३ विकेट लिए।
लिगको अन्तिम खेलसँगै अंक तालिकामा चेन्नईले १४ खेलमा ८ अंक जोड्यो।
