काठमाडौं जिल्ला क्रिकेट संघको आयोजनमा दोस्रो संस्करणको ‘जयकुमारनाथ शाह मेमोरियल इन्टर स्कुल क्रिकेट प्रतियोगिता’ मा मोक्षदा, सैनिक आवासीय र अपी स्कुल क्वार्टफाइनलमा पुगेका छन्।
साविक विजेता सैनिकले समूह ‘ए’ को खेलमा लगातार दोस्रो जित निकाल्ने क्रममा बुधबार क्रिएटिभ स्कुललाई ५८ रनले पराजित गर्यो।
पहिले ब्याटिङ गरेको सैनिकले राजदिप आचार्यको ६५ रनको मद्दतमा ६ विकेटको क्षतिमा १२७ रन बनायो। जवाफी ब्याटिङ गरेको क्रिएटिभ १८.३ ओभरमा ६९ रनमै अलआउट भयो।
मोक्षदाले समूह ‘बी’ मा लगातार दुई जित निकालेर अन्तिम आठमा स्थान पक्का गरेको हो। मोक्षदाले बुधबार जेम्स स्कुललाई ८६ रनले पराजित गर्यो। पहिले ब्याटिङ गरेको उसले इशान शाह सुवेदीको ६१ रनको मद्दतमा ४ विकेटको क्षतिमा १६६ रन बनायो। जवाफी ब्याटिङ गरेको जेम्सले २० ओभरमा ८ विकेटको क्षतिमा ८० रन मात्र जोड्न सक्यो।
यता अपीले समूह ‘एफ’ मा लगातार दुई जित निकालेर क्वार्टरफाइनलमा स्थान पक्का गर्यो। अपीले बुधबार एलआरआईलाई ५७ रनले हरायो। पहिले ब्याटिङ गरेको अपी १८.२ ओभरमा १२१ रनमा अलआउट भयो। १२२ रनको लक्ष्य पछ्याएको एलआरआई ११.१ ओभरमा ६४ रनमै अलआउट हुन पुग्यो।
यता नेपाल पुलिस स्कुलले समूह ‘डी’ को खेलमा विजयी सुरुवात गरेको छ। पुलिसले बुधबार आफ्नो पहिलो खेल खेल्ने क्रममा भ्याली पब्लिक स्कुललाई ८५ रनले पराजित गरेको हो।
२१ टोलीले भाग लिएको यो प्रतियोगितालाई वर्षको एसिसी मेन्स यू–१६ इस्ट जोन कप २०२५ को छनोट प्रतियोगिताका रूपमा समेत लिइएको छ। यस प्रतियोगितामा उत्कृष्ट प्रदर्शन गर्ने खेलाडीहरुलाई काठमाडौं जिल्लाको टोलीमा स्थान दिँदै नेपालको राष्ट्रिय यू-१६ टोलीको छनोटका लागि अवसर दिइनेछ।
