एभरेस्ट प्रिमियर लिग(इपिएल) क्रिकेट प्रतियोगिताको खेल तालिका बिहिबार सार्वजनिक भएको छ।
इपिएलले सार्वजनिक गरेको खेल तालिका अनुसार पुस ३ गते उद्घाटन खेल हुने र सो खेलमा काठमाडौं किंग्स इलेभेन र ललितपुर पाट्रिओट्सबीच प्रतिस्पर्धा हुनेछ।
कीर्तिपुरस्थित त्रिभुवन विश्वविद्यालयको मैदानमा हुने किक्रेट लिगमा काठमाडौं किंग्स इलेभेन, ललितपुर पाट्रिओट्स, विराटनगर वारियर्स, भैरहवा ग्लाडिएटर, पोखरा राइनोज र चितवन टाइगर्स गरि ६ टिमबीच प्रतिस्पर्धा हुँदैछ।
इपिएलका लागि प्रत्येक टिमले १०–१० खेलाडी आफ्नो टिममा अनुबन्धन गरिसकेका थिए। अब प्रत्येक टिमले ३–३ जना विदेशी तथा एक स्थानीय खेलाडी ट्यालेन्ट हन्टमार्फत छान्न बाँकी छ। विदेशी खेलाडीको नाम भने अहिलेसम्म सार्वजनिक गरिएको छैन।
इपिएलको लागि अलराउन्डर आरिफ शेख, तीव्र गतिका बलर करण केसी, युवा स्पिनर सन्दीप लामिछाने र विकेटकिपर ब्याट्सम्यान विनोद भण्डारी सबैभन्दा बढी १ लाख ७५ हजार रुपैयाँमा विक्री भएका थिए। आरिफलाई भैरहवा ग्लाडिएटरले भित्र्याउँदा करणलाई विराटनगर वारियर्सले आफ्नो टिममा राखेको थियो। सन्दीप ललितपुर पाट्रिओट्समा र विनोद पोखरा राइनोजमा आबद्ध रहेका छन्।
