वीर गणेशमान राष्ट्रिय बक्सिङ च्याम्पियनको उपाधि त्रिभुवन आर्मीलाई

निशा भण्डारी

काठमाडौं, माघ २६

वीर गणेशमान राष्ट्रिय बक्सिङ प्रतियोगितामा टिम च्याम्पियनको उपाधि महिला र पुरुषतर्फ त्रिभुवन आर्मी क्लबले जितेको छ।

आर्मीले ६ तौल समूहमा तीन स्वर्ण, २ रजत र १ कांस्यसहित महिलातर्फ उपाधि जितेको हो।

शुक्रबार वसन्तपुर डबलीमा भएको फाइनल खेलमा आर्मीका लागि ६०-६४ केजी तौल समूहमा पुनम रावल, ५४-५७ केजीमा चन्द्रकला थापा र ५१-५४ केजीमा मिनु गुरुङले स्वर्ण पदक हासिल गरे । पुनमले एपीएफकी सरस्वती रानालाई पराजित गर्दा चन्द्रकलाले एपीएफकै सुलभ थापामगरलाई हराइन् । मिनुले नेपाल पुलिस क्लबकी निशा तामाङलाई पराजित गरिन् ।

त्यस्तै, प्रतियोगिताको अन्तिम दिन त्रिभुवन आर्मी पुरुषतर्फ पनि टिम च्याम्पियन बन्न सफल भयो। शनिबार भएका ८ फाइनलमध्ये आर्मीले ५ स्वर्ण जित्दै दुवै महिला र पुरुषको टिम च्याम्पियन उपाधि हासिल गरेको हो ।

यसैगरी, त्रिभुवन आर्मी क्लबका सुशील थापा र नेपाल पुलिस क्लबकी दिवाना शेर्मा वीर गणेशमान राष्ट्रिय बक्सिङ च्याम्पियनसिप २०१९ को सर्वोत्कृष्ट खेलाडी घोषित भएका छन्।

उनीहरूलाई आज आयोजित एक कार्यक्रममा मोटरसाइकल र स्कुटर प्रदान गरियो।

माघ २२ देखि २६ गतेसम्म चलेको प्रतियोगितामा प्रत्येक तौल समूहको विजेताले २५ हजार प्राप्त गरेका छन्।