ठूली भेरी नदीमा पौडी खेल्ने गएका दुई किशोर किशोरीको डुबेर मृत्यु भएको छ। अर्की एक किशोरी बेपत्ता छन् ।
जाजरकोटको नलगाड नगरपालिका –८ की छोरी १६ वर्षीया भगवती नेपाली र १० बर्षीय महेश कुसारीको मृत्यु भएको छ।
महेशकी दिदी १२ वर्षीया आशा कुसारीको खोजी भइरहेको छ।
नदीमा तीन बालबालिका बगिरहेको भन्ने सूचना पाउनासाथ रुकुम पश्चिमको इलाका प्रहरी कार्यालय आठबिसकोटबाट प्रहरी निरीक्षक गणेश खनालको नेतृत्वमा ९ जनाको प्रहरी उद्धारका लागि खटिएको थियो।
प्रहरी टोलीले भगवतीलाई अचेत अवस्थामा उद्धार गरी आठबिस कोट पुर्याउँदा चिकित्सकले शुक्रबार दिउँसो सवा तीन बजेतिर मृत घोषणा गरेका थिए।
महेशको शव भने कपडा फुकालेर राखेको नदी किनारको ठाउँमा भन्दा झन्डै ९ सय मिटर दक्षिणमा सवा चार बजेतिर शब फेला परेको थियो ।
रुकुम पश्चिममा प्रहरी प्रमुख डिएसपी प्रमेश बिष्टका अनुसार शुक्रवार दिउँसो विद्यालयबाट घर आएपछि उनीहरु नुहाउन भनेर नदीमा गएका थिए ।
सबै भन्दा पहिला पौडी खेल्न भनेर महेश कुसारी नदीमा पसेको र उनी बग्न थालेपछि दिदी आशा र भगबती महेशलाई जोगाउन भनेर नदीमा पसेका थिए। भाइ महेशलाई जोगाउन भनेर नदीमा पसेकी भगवतीको पनि मृत्यु भइसकेको छ भने महेशकी सहोदर दिदी आशा भने अझै बेपत्ता छिन्। उनको खोजीका लागि दुवै जिल्लाका प्रहरीका साथै स्थानीय खटिएका छन् ।
घटनास्थल दुई जिल्लाको सीमाना हो ।
उनीहरु बगेको स्थान रुकुमपश्चिमको आठबिसकोट नगरपालिका – ९ र जाजरकोट जिल्लाको नलगाड नगरपालिका – ८ को मन्मैमा पर्छ।
