झारफुकको बहानामा यौन शोषण गर्ने एक व्यक्तिलाई प्रहरीले नियन्त्रणमा लिएको छ।
रत्ननगर नगरपालिका–९ स्थित घरमा झारफुक गर्न आएका महिलाहरूलाई यौन शोषण गरेको उजुरीको आधारमा ५६ वर्षीय पुरूषलाई पक्राउ गरिएको जिल्ला प्रहरी कार्यालय चितवनले जनाएको छ।
जिल्ला प्रहरीका प्रवक्ता डिएसपी रवीन्द्र खनालका अनुसार ती व्यक्तिले १७ वर्षीया बालिका र २९ वर्षीया महिलालाई झारफुकको बहनामा यौन शोषण गरेको उजुरी परेको थियो।
विदेश जानका लागि के कस्तो छ भनेर हेराउन गएकी कक्षा १२ मा पढ्ने बालिकालाई मसान लागेको छ, पन्छाउनुपर्छ भन्दै कोठाभित्र लगेर यौन शोषण गरेको उजुरीमा उल्लेख रहेको उनले बताए।
अर्की महिला श्रीमानसँग विवाद भइरहेपछि झारफुकका लागि पुगेकी थिइन्। उनलाई पनि कोठामा लगेर गंगाजल छर्केजस्तो गरेर मन्त्र वाचन गर्दै ललाइ फकाइ यौन शोषण गरेको उजुरी प्राप्त भएको डिएसपी खनालले जानकारी दिए।
बाहिरबाट ढोका ढकढकाएपछि मात्रै उनले ती महिलालाई छाडेका थिए।
