बम बिस्फोट पछि इँट्टाभट्टामा जलाएर मारेको आरोप लागेका नेपाली कांग्रेसका नेता मोहम्मद आफताब आलमले सफाइ पाएसँगै छुटिसकेका छन्।
बुधबार उच्च अदालत जनकपुरको वीरगञ्ज इजलासले विष्फोटक पदार्थ बम समेतको प्रयोग गरी ज्यान मार्ने उद्योग तथा कर्तव्य ज्यान सम्बन्धीको कसूरको गरेको अभियोगबाट सफाइ दिएको हो।
न्यायाधीशहरू खुसीप्रसाद थारू र अर्जुन महर्जनको इजलासले आफताब आलमसहित चार जनालाई सफाइ दिने फैसला गरेको हो।
उक्त सफाइ दिएसँगै कारागार कार्यालय नख्खुमा रहेका मोहम्मद आफताब आलम छुटे। उनका भाइ मोहम्मद महताब आलम, शेख सेरोज भन्ने शेख सराज र बद्री सहनीले पनि सफाइ पाएका हुन्।
जिल्ला अदालत रौतहटले उनीहरू चारै जनालाई २०८१ वैशाख १३ गते जन्मकैदको फैला गरेको थियो। सरकारी वकिलले प्रतिवादी बनाएका मुक्ति साहलाई भने सफाइ दिएको थियो।
उक्त फैसलामा चित्त नबुझेपछि सरकारी वकिलले मुक्ति साहविरूद्ध पुनरावेदन गरेको थियो। यता प्रतिवादी आलमसहित चारै जनाले पनि उच्च अदालत जनकपुर वीरगञ्ज अदालतमा पुनरावेदन गरेपछि फैसला उल्टिएको हो।
यसरी उल्टिएको फैसलाको पूर्णपाठ आउन बाँकी छ। तर अदालतले राय किताबमा केही आधार दिएर सफाइ दिने निर्णय गरेको वीरगञ्ज इजलासका रजिस्ट्रार दीपक भण्डारीले बताए।
‘नारायण सिंह राजपुतको जाहेरीले वादी नेपाल सरकार, प्रतिवादी मोहम्मद अफताब आलम समेत भएको विष्फोटक पदार्थ समेतको प्रयोगसमेतको प्रयोग, ज्यान मार्ने उद्योग तथा कर्तव्य ज्यान सम्बन्धी कसुरका मुद्दामा रौतहट जिल्ला अदालतको २०८१ वैशाख १३मा भएको फैसला उल्टी भई यस प्रतिवादी मोहम्मद अफताब आलाम, मोहम्मद महताब आलम, शेख शेराज भन्ने शेख सराज र बद्री सहनीलाई सुरू जिल्ला अदालतले गरेको फैसला उल्टी भई अभियोग दाबीबाट सफाइ पाउने ठहर्छ,’ फैसलाको राय किताबमा लेखिएको छ।
मुक्ति साहको हकमा पनि सफाइलाई सदर गरेको थियो।
उनका अनुसार तीन वटा आधार प्रस्तुत गरेको छ।
पहिलो आधार: २०६४ चैत २७ मा बम बिस्फोट भएको भनिएको वारदात वस्तुनिष्ठ प्रमाणले पुष्टि हुन नसकेको उल्लेख छ।
दोस्रो आधार: बिस्फोटमा घाइते भएको भनिएका पिन्टु भन्ने त्रिलोक प्रताप सिंह र ओसी अख्तरलाई ट्याक्टरमा हालेर राजा इट्टा भट्टामा लगेर पोलेको भन्ने ठोस सबुत-प्रमाण वादीले पेस गर्न नसकेको भनिएको छ। पिन्टु र ओसीको मृत्युसमेत भएको थियो।
तेस्रो आधार: विधि विज्ञान प्रयोगशालाको परीक्षण प्रतिवेदनबाट समेत मृतकलाई इट्टाभट्टामा लगि पोलेको भन्ने अभियोग दाबी पुष्टि हुननसकेको उल्लेख छ।
यी तीन वटा आधार प्रस्तुत गर्दै चारै जनालाई सफाइ दिने फैसला गरेको हो।
उच्च सरकारी वकिल कार्यालय वीरगन्जले भने यो फैसला चित्तबुझ्दो नभएको बताएको छ।
‘फैसला चित्तबुझ्दो आएको छैन। यसमा पक्का पनि पुनरावेदन हुन्छ। पूर्णपाठ पनि आउन बाँकी छ। वारदात नै स्थापित नहुने गरी फैसला भएको छ,’ कार्यालयका एक सरकारी वकिलले भने, ‘सरकारी वकिलले सर्वोच्चमा गर्ने नै हो। हामीले महान्यायाधिवक्ता कार्यालयमा पनि खबर गरिसकेका छौं। ७० दिनको म्याद हुन्छ त्यही समय अवधिभित्र पुनरावेदन गर्छौं।’
२०६४ सालको पहिलो संविधानसभा निर्वाचनको पूर्वसन्ध्यामा रौतहटको साबिक राजपुर गाविस-४ फरहदवामा बम बिस्फोट गराएको र त्यसक्रममा केहीलाई जिउँदै इँटाभट्टामा लगेर जलाएको आरोप कांग्रेस सांसद आलमसहितका व्यक्तिमाथि आरोप लागेको हो।
आलमका काका शेख इद्रिसको गोठमा चैत २७ गते साँझ साढे ६ बजे बम विस्फोट भएको थियो। बिस्फोटमा परी गोठमा भएका केही व्यक्तिको मृत्यु र झन्डै दुई दर्जन घाइते भएको आशंका थियो।
मृतक र घाइतेलाई नजिकैको इँटाभट्टाको भुंग्रोमा हालेर जलाइएको आरोप आलममाथि लागेको थियो।
-1748443879.jpg)
