राजस्व अनुसन्धान विभागले रूपन्देही, सिद्धार्थनगर नगरपालिका, वडा नं. ८ लुम्बिनी गेटस्थित सुन्दर प्लाइउड सेन्टरलाई राजस्व चुहावट गरेको भन्दै मुद्दा दायर गरेको छ।
विभागले राजस्व अनुसन्धान कार्यालय बुटवलमार्फत् राजस्व चुहावटसम्बन्धी कसुरमा अनुसन्धान गरी सुन्दर प्लाइउड सेन्टरका प्रोप्राइटर आकाश अग्रहरीविरूद्ध उच्च अदालत तुलसीपुर बुटवल इजलासमा मुद्दा दायर गरेको हो।
स्थायी लेखा नम्बर ६०५७११९४९ नं. रहेको सुन्दर प्लाइउड सेन्टरका प्रोप्राइटर आकाश अग्रहरीविरूद्ध राजस्व चुहावट अनुसन्धान तथा नियन्त्रण ऐन २०५२ (संशोधन सहित) को दफा २०(६) बमोजिम मुद्दा दायर गरिएको विभागले जनाएको छ।
राजस्व अनुसन्धान कार्यालय बुटवलका प्रमुख विवेक घिमिरेका अनुसार अग्रहरीले फर्मका नाममा माल वस्तु खरिद गरी मौज्दात किताबमा प्रविष्टि नगरी र बिजक नै जारी नगरी माल वस्तु बिक्री गरेको र बिक्री भएको माल वस्तुको अभिलेख समेत बिक्री खातामा प्रविष्टि नगरेको भेटिएको तथा पेस गरेको मौज्दात विवरण भन्दा बढी माल वस्तु गोदामबाट फेला पर्नु, बढी फेला परेको माल वस्तुको खरिद तथा भन्सार पैठारी गरेको कुनै प्रमाण फेला नपरेकोले राजस्व चुहावट गरेको पुष्टि गरी ५३ लाख २७ हजार छ सय ४६ रुपैयाँ बिगो कायम गरी त्यसको शतप्रतिशत जरिवानासहित १ करोड ६ लाख ५५ हजार २९२ रुपैयाँ असुलका लागि मुद्दा दायर गरिएको हो।
बुधबार मुद्दा दायरपछि राजस्व विभागका प्रवक्ता कृष्ण कुमारी श्रेष्ठले जारी गरेको विज्ञप्तिमा ‘अग्रहरीले सञ्चालन गरेको प्लाइउडको पसल तथा गोदामको खानतलासी तथा माल वस्तुको भौतिक निरीक्षण गरी बिल बिजक, खरिद खाता, विक्री खाता, लगायत अन्य आवश्यक कागजातहरू तथा माल वस्तुको भौतिक गणना गरी विश्लेषण गर्दा उक्त फर्मको मौज्दात किताबमा प्रविष्टि गरेबमोजिमको परिमाण भन्दा भौतिक निरीक्षणबाट प्राप्त परिमाण बढी देखिएको तथा केही माल वस्तुको परिमाण कम देखिनु जस्ता विभिन्न पक्ष समेतलाई हेर्दा निज प्रतिवादीले प्रस्तुत फर्मका नाममा माल वस्तु खरिद गरी मौज्दात किताबमा प्रविष्टि नगर्नु, बिजक नै जारी नगरी माल वस्तु बिक्री गर्नु, बिक्री भएको माल वस्तुको अभिलेख बिक्री खातामा प्रविष्टि नगर्नु, पेस गरेको मौज्दात विवरण भन्दा अधिक माल वस्तु गोदामबाट फेला पर्नु, बढी फेला परेको माल वस्तुको खरिद तथा भन्सार पैठारी गरेको कुनै निस्सा प्रमाण निजसँग नहुनु तथा कारोबार छल्ने उद्देश्यले न्यून बिक्री देखाई निजले राजस्व चुहावट अनुसन्धान तथा नियन्त्रण ऐन २०५२ (संशोधन सहित) को दफा २०(६) बमोजिम मुद्दा दायर गरिएको छ,’ विज्ञप्तिमा उल्लेख छ।
विज्ञप्तिमा भन्सार चोरी पैठारी तर्फको अधिक मौज्दातको बिगो तीन लाख २५ हजार ८०७, मूल्य अभिवृद्धि कर तर्फको अधिक मौज्दातको बिगो दुई लाख ५२ हजार २७८, मूल्य अभिवृद्धि कर तर्फको न्यून मौज्दातको बिगो १५ लाख ६९ हजार २३६ र आयकर तर्फको बिगो ३१ लाख ८० हजार ३२५ गरी ५३ लाख २७ हजार छ सय ४६ रुपैयाँ बिगो कायम गरी बिगोको शत प्रतिशत जरिवाना सहित १ करोड ६ लाख ५५ हजार २९२ रुपैयाँ असुल उपर गर्न र ऐनको दफा २३(१)(ख) बमोजिम सजायँको माग दाबि सहित मुद्दा दायर गरिएको उल्लेख छ।
