काठमाडौंको तीनकुनेमा भएको हिंसात्मक घटनाको मुद्दा अहिले जिल्ला अदालत काठमाडौंमा पुगेको छ।
बुधबार पनि जिल्ला अदालत काठमाडौंमा प्रतिवादीहरूको बयान जारी छ।
सरकारी वकिलको कार्यालय काठमाडौंले राज्यविरूद्धको कसुर, आपराधिक उपद्रव र संगठित अपराधमा 'संयुक्त जनआन्दोलन समिति' ले तोकेका 'जनकमाण्डर' दुर्गा प्रसाईं, समितिका सदस्य सचिवसमेत रहेका राप्रपाका वरिष्ठ उपाध्यक्ष रवीन्द्र मिश्र, महामन्त्री धवलशमशेर राणासहित ५० जना र ११ जनाविरूद्ध आपराधिक उपद्रव कसुरमा मुद्दा दायर गरेको थियो।
प्रसाईंसहित आठ जनाविरूद्ध भने कर्तव्य ज्यान र ज्यान मार्ने उद्योगमा पनि मुद्दा दर्ता भएको थियो।
यसरी मुद्दा दर्ता गर्दा अदालतमा प्रतिवादीहरू पनि उपस्थित गराउनुपर्छ। तर त्यतिबेला सबै जना उपस्थित भएका थिएनन्।
५० जनामध्ये ३९ जना र ११ जनामध्ये १० जनामात्रै अदालतमा उपस्थित भए। हाल अदालतमा उपस्थित भएकाहरूको बयान लिने काम भइरहेको छ।
६१ जनाबाहेक चार जना नाबालक छन्। उनीहरूविरूद्ध सरकारी वकिलले बाल अदालत भक्तपुरमा मुद्दा दर्ता गरेको हो।
यसरी मुद्दा दर्ता गर्नुअघि सरकारी वकिल कार्यालय काठमाडौंले कतिपय प्रतिवादीहरूलाई हाजिर जमानीमा छाडेको थियो।त्यसमध्ये राप्रपाका वरिष्ठ उपाध्यक्ष मिश्र र सांसद राणा पनि हुन्।
राणाको स्वास्थ्य उपचारको लागि भारत जानुपर्ने भएकाले उनलाई सरकारी वकिलले नै हाजिर जमानीमा छाडेको थियो।
उनको श्रीमतीको रोहबरमा हिरासतबाट मुक्त गराइएको थियो।
तर लामो समयसम्म रवीन्द्र मिश्रलाई भने सरकारी वकिलले छाडेको थिएन। उनका वकिलहरूले हाजिर जमानीमा राख्नुपर्ने माग गर्दै अदालतमा बहस समेत गरे। तर हाजिर जमानीमा छाड्न अस्वीकार गरेपछि उनी सर्वोच्च अदालत पुगे।
सर्वोच्च अदालतमा उनकी श्रीमतीले गैरकानुनी रूपमा थुनामा राखिरहेको भन्दै बन्दी प्रत्यक्षीकरणको रिट दायर गरिन्। चैत १५ गते पक्राउ परेका मिश्रलाई जेठ २ गते हाजिर जमानीमा छाड्न आदेश दिएको थियो।
मिश्रलाई अधिवक्ता श्यामबहादुर शाही र बसन्त ब्लोनको रोहबरमा छाडियो।
आइतबार सरकारी वकिल र प्रहरीले मिश्र र राणाको खोजी गर्यो। तर उनीहरू उपस्थित भएनन्।
जिल्ला प्रहरी परिसर काठमाडौंले जिम्मा बसेकाहरूलाई पनि सम्पर्क गर्यो तर जिम्मा बसेकै व्यक्तिको सम्पर्कमा नरहेको प्रहरीको भनाइ थियो।
‘हामीले धवलशम्शेरकी श्रीमतीसँग सोधिखोजी गर्यौं। म काठमाडौं छु, धवलशम्शेर नेपालगन्जमा छु भन्ने जानकारी गराउनुभयो,’ परिसरका प्रवक्ता एसपी अपिलराज बोहराले भने, ‘मिश्रजीसँग सम्पर्क हुन सकेन। उहाँका वकिलहरू अझै पनि खोजीमै हुनुहुन्छ, नभए जिम्मा बस्नेलाई नै अप्ठेरो पर्नसक्छ।’
जिम्मा बस्ने व्यक्तिले हाजिर गराउन नसकेमा जरिवाना समेत गराउन सक्ने व्यवस्था गरेको छ। मुलुकी अपराध कार्यविधि संहिता २०७४को दफा १५ को उपदफा ४ अनुसार अनुसन्धान अधिकृतले ५० हजारसम्म जरिवाना गराउने व्यवस्था छ।
उनीहरू किन हाजिर भएनन् भन्ने विषयमा हामीले मिश्रको तर्फबाट बहस गरेका एक जना वकिलसँग कुराकानी गरेका छौं।
ती वकिलका अनुसार अहिले उनीहरू हाजिर हुँदैनन्।
उनीहरू अहिले चलिरहेको बयान र थुनछेक बहसको प्रक्रिया सकिएपछि निवेदन दिएर जिल्ला अदालत काठमाडौंमा उपस्थित हुनसक्छन्।
‘अहिले ५० जनाको बयान भइरहेको छ। यसपछि थुनछेक बहस पनि चलिरहेको छ। यो प्रक्रिया लम्बिन सक्छ। उहाँहरू यो प्रक्रिया सकिएपछि हाजिर हुने सम्भावना छ,’ ती वकिलले भने।
यस्तै अहिले हाजिर भएमा न्यायिक हिरासतमा बस्न पर्ने पनि उनले बताए।
‘अहिले हाजिर भएमा थुनछेक आदेश न आउँदासम्म उहाँलाई न्यायाधीशले हिरासतमा पनि राख्न सक्नुहुन्छ। नराख्न पनि सक्नुहुन्छ,’ उनले भने, ‘सर्वोच्चको आदेशले छुटेको हुनाले आउनुभएको भए पनि हुने हो। तर उहाँहरू अब पछि मात्रै आउनुहोला।’
एक जना प्रहरी अधिकारीले पनि मिश्र र राणा हिरासतमा बस्नुपर्ने कारणले नै हाजिर नभएको बताए।
‘उहाँहरू अहिलेसम्म हाजिर हुनुभएको त छैन। तर यस प्रक्रिया बीचमा हाजिर हुनलाई परिसर नै जानुपर्छ। परिसरबाटै अदालतमा ल्याउने हो,’ उनले भने, ‘हाजिर भए हिरासतमा बस्नुपर्ने हुनसक्ने भएरै होला नआएको। यो थुनछेक सकिएपछि आउन सक्छन्।’
