सशस्त्र प्रहरी बल नेपालले मनसुनजन्य विपद न्यूनीकरण तथा उद्धारका लागि तयारी थालेको छ।
यसका लागि देशभरी नै विपद जनचेतना दिने उद्देश्यले 'रेस्पोन्स पट्रोल' सुरू गरिएको सशस्त्र प्रहरी बलका सहप्रवक्ता एवं डिएसपी शैलेन्द्र थापाले जानकारी दिए।
उनका अनुसार टोलटोलमा विपद सूचक राख्नेदेखि, सशस्त्र प्रहरीका सबै युनिटमा विपद व्यवस्थापनका आधारभूत सामानको व्यवस्थापन गर्ने, विपद सम्बन्धी अनुशिक्षण तथा अभ्यास सञ्चालन गर्ने लगायतका छन्।
अघिल्ला वर्षहरूमा भएको विपदका घटनाहरूलाई विश्लेषण गर्दै आगामी दिनमा हुनसक्ने जोखिम न्यूनीकरणका लागि अवलम्बन गर्नुपर्ने उपायका बारेमा मंगलबार प्रधान कार्यालय हलचोकमा छलफल भएको थियो।
उपत्यकाका सबै युनिट कमाण्डर तथा फिल्डमा खटिने सिनियर, जुनियर अधिकृत तथा अन्य दर्जा समेतको सहभागितामा छलफल गर्दै फिल्डमा खटिँदा भोगेका अनुभव र समस्या तथा नयाँ रणनीतिको बारेमा पनि छलफल गरिएको डिएसपी थापाले बताए।
विपद सूचक अन्तर्गत आफ्ना पूर्वकर्मचारी समेत यसमा सहभागी गराउँदै वडा–वडामा सचेतनामूलक कार्यक्रम गर्ने सशस्त्र प्रहरीले तयारी थालेको छ।
यसबाट विपदको बारेमा तत्काल सूचना प्राप्त गर्न सकिएमा छिटोभन्दा छिटो उद्धारका कार्यमा खटिन सक्ने विश्लेषण गरिएको डिएसपी थापाले बताए।
‘अब प्रत्येक दर्जाको आधारभूत तालिममा अनिवार्य रूपमा १५ दिनको विपद व्यवस्थापन तालिम सञ्चालन गरिने लक्ष्य छ। सशस्त्र प्रहरीका युनिटमध्ये विपद व्यवस्थापन साधनस्रोत सम्पन्न, कम स्रोतसाधन भएका र नभएका गरी ३ तहमा विभाजन गरेर साधनस्रोत नभएका युनिटमा तत्काल आधारभूत सामग्री व्यवस्थापन गरिनेछ,’ उनले भने।
छलफल कार्यक्रममा सशस्त्र प्रहरी महानिरीक्षक राजु अर्यालले विपद व्यवस्थापनको लागि स्थानिय स्रोत साधनको अधिकतम प्रयोग गर्न र सामान पुगेन भनेर पन्छिने छुट कसैलाई नभएको बताएका थिए।
विपदको समयमा सरकार छ, सुरक्षाकर्मी छन् भन्ने आम जनतामा भरोसा हुनुपर्ने उनले बताएका थिए। उनले आगामी मनसुनमा के गर्ने भन्ने बारेको स्पष्ट खाका तयार गर्न समेत विभागीय प्रमुखहरूलाई निर्देशन दिएका छन्।
विपदको समयमा तयारी र परिचालन उत्कृष्ट हुन जरूरी रहेको र विपद भएको स्थानमा छोटो भन्दा छोटो समयमा पुग्न सकेमा मात्र जनधनको क्षति न्यूनिकरण गर्न सकिने उनले बताए।
उनले २४ सै घण्टा परिचालन हुनको लागि सबै युनिटमा टोलीहरू तयारी हालतमा राख्न समेत निर्देशन दिए।
परिचालन ढिला नहोस् र सम्बन्धित ठाउँमा पुग्न अलमल नहोस् भनेर आफ्नो जिम्मेवारी क्षेत्रभित्र सबै युनिटले विपद जनचेतना तथा रेस्पोन्स पेट्रोल सञ्चालन गरी आफ्नो एरिया बारेमा जानकार रहन समेत प्रधान कार्यालयले मातहत युनिटलाई निर्देशन दिएको छ। यसैगरी समुदाय लक्षित विपदसम्बन्धी स्वयमसेवक तालिम सुरू गरिएको छ।
-1727505954.jpg)
