काठमाडौं महानगरपालिका वडा नम्बर २४ स्थित मखन गल्लीको एक घरमा बुधबार बिहान आगलागी भयो।
खाना पकाउने ग्यास लिक भएर आगो फैलिएको थियो।
दयाराम श्रेष्ठको घरको तेस्रो तल्लाबाट आगलागी सुरू भएको थियो। आगलागी भएको थाहा पाएपछि यो घरमा रहेका मानिसहरू बाहिर निस्किए।
तर आगो लागेको तलाभन्दा माथिल्लो तला (चौथो तला) मा बसोबास गर्दै आएकी ८० वर्षीया वृद्धा घरबाहिर निस्कन सकिनन्।
काभ्रे घर भई मखन गल्लीको उक्त घरको चौथो तलामा बस्दै आएकी ८० वर्षीया विष्णु अधिकारी मृत फेला परेकी हुन्। घरमा लागेको आगो निभाउने क्रममा उनको शव फेला परेको थियो।
उनी नाङ्लोमा सामान राखेर बेच्ने काम गर्दै आएको खुलेको घटनास्थलमा खटिएका एक प्रहरी अधिकृतले जानकारी दिए।
ती प्रहरीका अनुसार उनका श्रीमानको पनि चैतमा मृत्यु भएको थियो। उनीहरूको परिवारमा कति जना थिए भन्ने विस्तृत खुल्न सकेको छैन।
साथै आगो छिमेकी रूकेश श्रेष्ठको पाँच तले घरमा पनि सल्किएको थियो। उक्त घरमा रहेका मानिसहरू घर बाहिर निस्केका थिए।
करिब तीन घन्टामा आगो नियन्त्रणमा लिइएको प्रहरीले जनाएको छ। नेपाल प्रहरी, सशस्त्र प्रहरी, नेपाली सेना र स्थानीयको मद्दतमा आगलागी नियन्त्रणमा लिइएको हो।
जुद्धवारूणको दुइटा दमकल, नेपाली सेनाको एउटा, रामहिटी, ललितपुर महानगर र बालाजु औद्योगिक क्षेत्रको गरी ६ वटा दमकल प्रयोग गरी आगो नियन्त्रणमा लिइएको प्रहरीले जनाएको छ।
-1746009348.jpg)
