पाथीभरा (मुकुम्लुङ) मा केबलकार निर्माण गर्नु हुँदैन भनेर आवाज उठाइरहेका ‘पहिचानका लागि युवा’ संस्थाले वार्ता र संवादमार्फत् समस्या समाधान गर्न सबै पक्ष तयार हुनुपर्ने बताएको छ।
बिहीबार काठमाडौंमा पत्रकार सम्मेलन गरी संस्थाले वार्ताका माध्यमबाट पाथीभरा केबलकारको समस्या समाधान गर्न आफूहरू तयार रहेको बताएको हो।
पत्रकार सम्मेलनमा संस्थाका अध्यक्ष कृष्ण चोङवाङले आफूहरू विकास विरोधी नरहेको भन्दै समस्या समाधानका लागि सरकारसँग खुला ढंगले वार्ता गर्न तयार रहेको बताए।
उनले आन्दोलनरत समूहहरूसँग सरकारले वार्ता नगरी पेल्ने काम गरिरहेको गुनासो गरे।
उनले विभिन्न तरिकाबाट वार्ताको पहल भइरहे पनि सरकारले बेवास्ता गरेको बताए।
समस्या समाधानका लागि ध्यानाकर्षण होस् भनेर काठमाडौंमा पत्रकार सम्मेलन गरिएको बताए। आन्दोलनरत समूहलाई सरकारले बोलाएर समस्याको पहिचान गरे वार्ता र संवादबाटै समस्याको समाधान निस्किने उनको भनाइ छ।
उनले भने, ‘वार्ताको लागि अगाडि आन्दोलनमा त अलग अलग समूह पनि हुन्छन्, धेरै संघसंस्था मिलेर गरेको हो। त्यसमा अगाडि केही वार्ताहरू भएका छन्। तर सार्थक वार्ता हुन सकेन। त्यसले निकास दिन सकेन मलाई थाहा भएसम्म त्यहाँ पनि सरकारले वा सरकारी पक्षले पेल्ने काम मात्रै गरिराछ। तर यो चाहिँ के हो भने जनस्तरमा भइरहेका वास्तविक समस्या के हो त? भनेर बुझ्नेसम्म वार्ता हुन सकेन। अब जनस्तरबाटै के गर्न सकिन्छ, समाधान कसरी गर्न सकिन्छ? केबलकार निर्माण बन्द गर्नुमात्रै समाधान हो कि त? या अरू हिसाबले गर्न सकिन्छ त? भन्ने हिसावले छलफल नै नगरीकन आएको हुनाले हामीले जनस्तरबाट वार्ता संवाद गर्नुपर्यो भने हामी तयार छौँ गर्नु पनि पर्छ। होइन यसरी पेलेरै जाने हो भने प्रतिरोधमै उत्रिन्छौँ। हामी खुला ढंगले संवाद पनि गर्नसक्छौँ, गर्नुपनि पर्छ। त्यसको पहल पनि गर्नुपर्छ।’
उनले अगाडि भने, ‘र यसको निकासका लागि कोही लागि पर्नुभएको छ भने ध्यानाकर्षण पनि होला। त्यसपछाडि संवाद मजाले हुन सक्ला भन्ने ध्ययले पनि गरिएको हो। हिजो जति भयो जसरी भयो अब वास्तवै समस्या समाधान गर्न थप संवाद र वार्ता गर्ने वातावरण बन्ला भन्ने हामीले अपेक्षा गरेका छौँ। आउनुस् वार्ता गरौँ पनि भन्नुभएको छैन, दुःख लाग्दो कुरो चाहिँ उहाँहरू पेलेरै जाने शुरमा देखिन्छ। उहाँहरूको जुन भूमिका छ यसको हामी विरोध गर्छौं। तिमीहरूको समस्या के हो भनेर आन्दोलनमा हुने सबै संस्था समूहलाई बोलाएर समस्या पहिचान गर्न खोज्नु भयो भने समाधान त अवश्य छलफल र वार्ता संवादबाटै निस्कन्छ नि त।’
लिम्बूवान ब्रदरहुडका अध्यक्ष मिक्तोक लिम्बूले पाथीभरा लिम्बुको अस्तित्व र पहिचानसँग जोडिएको धरोहर भएकाले केवलकार निर्माण गर्दा पहिचान नगुम्ने ग्यारेन्टी हुनुपर्ने बताए।
उनले आफ्नो माग सम्बोधनका लागि विगत सात वर्षदेखि विभिन्न आन्दोलनमार्फत् ध्यानाकर्षण गराएपनि सरकारले नसुनेको बताए।
विश्वका जुनसुकै युद्ध, क्रान्त्रि वा राजनीतिक आन्दोलन वार्ता र सम्बादबाटै समस्या समाधान भएको भन्दै उनले केवलकार निर्माणको विषय पनि सम्बादबाटै हल हुने बताए।
विकासको मोडलबारे स्थानीयस्तरमा छलफल र बहस हुनुपर्ने उनको भनाइ छ।
पहिचानका लागि युवाका केन्द्रिय संयोजक विराज आङदम्बे लिम्बूले स्थानीय पहिचानसँग जोडिएका सभ्यताको अस्तित्व रक्षाका लागि राज्यसँग लडाइँ भइरहेको बताए।
उनले संघीय लोकतान्त्रिक गणतन्त्रको संविधानले दिएको अधिकार सदुपयोग गरी आफूहरू जनताको भावना जोडिएको संस्कृति रक्षाका लागि आन्दोलन गरेको बताए। - न्यूज एजेन्सी नेपाल
-1746009348.jpg)
