इसराइली सेनाले सोमबार गजामा रहेको आफ्नो कर्मचारी निवास र मुख्य गोदाममा आक्रमण गरेको विश्व स्वास्थ्य संगठनले (डब्लुएचओ) बताएको छ।
डब्लुएचओले गजाको देर अल-बलाहमा आफ्नो कर्मचारी निवासमा तीन पटक आक्रमण भएको जनाएको छ।
हवाई हमलाले आगलागी भएको र व्यापक क्षति पुर्याएको अनि कर्मचारी तथा उनीहरूका परिवार, बालबालिका सहितलाई खतरामा पारेको बताएको छ।
सोमबार इसराइली ट्याङ्कहरूले पहिलो पटक देर अल-बलाहको दक्षिणी र पूर्वी जिल्लाहरूमा प्रवेश गरेका थिए।
इसराइलले उक्त क्षेत्रमा बन्धकहरू लुकाइएको हुन सक्ने भन्ने गरेका छन्। स्थानीय चिकित्सकहरूका अनुसार उक्त क्षेत्रमा ट्याङ्कले गरेको गोलाबारीले घर र मस्जिदहरूमा क्षति पुर्याएको भनेर बेलायती पत्रिका द गार्डियनले लेखेको छ। त्यसमा कम्तीमा तीन प्यालेस्टिनीको मृत्यु भएको छ भने धेरै घाइते भएका छन्।
गजाको स्वास्थ्य मन्त्रालयले आफ्नो दैनिक अपडेटमा अघिल्लो २४ घण्टामा इसराइली गोलाबारी र सैन्य हमलाबाट कम्तीमा १३० प्यालेस्टिनी मारिएको र १,००० भन्दा बढी घाइते भएको भनेर सोमबार बताएको थियो। यो हालैका हप्ताहरूमा सबभन्दा उच्च संख्या हो।
'इसराइली सेना परिसरमा प्रवेश गर्यो, महिला र बालबालिकाहरूलाई लडाइँ चलिरहेकै बेलामा पैदलै अल-मावासीतिर जान बाध्य पार्यो। पुरूष कर्मचारी र परिवारका सदस्यहरूलाई हतकडी लगाइयो, कपडा खोल्न लगाइयो, सोधपुछ गरियो, र बन्दुकको नोकमा चेक गरियो,' डब्लुएचओले भनेको छ।
उनीहरूले दुई कर्मचारी र दुई परिवारका सदस्यहरूलाई हिरासतमा लिएको डब्लुएचओले बतायो। त्यसमध्ये तीन जनालाई पछि रिहा गरिएको र एक कर्मचारी सदस्य हिरासतमा नै छन्।
डब्लुएचओका महानिर्देशक टेड्रोस एड्हानोम गेब्रेयससले भने, 'डब्लुएचओले हिरासतमा रहेका कर्मचारीहरूको तत्काल रिहाइ र आफ्ना सबै कर्मचारीहरूको सुरक्षाको माग गर्दछ।'
गजामा २१ महिनाभन्दा बढीको युद्धका कारण विस्थापित भएका प्यालेस्टिनीहरूले देर अल-बलाह भरिएको छ। इसराइलले हमासको पूर्वाधार र क्षमताहरू नष्ट गर्ने भन्दै खाली गर्ने आदेश जारी गरेपछि सयौं मानिसहरू पश्चिम वा दक्षिणतिर भागेका थिए।
तर, यो क्षेत्र विनाशग्रस्त क्षेत्रमा मानवीय सहायता प्रयासहरूको लागि मुख्य केन्द्र पनि हो। गजाका स्वास्थ्य अधिकारीहरूले आगामी दिनहरूमा भोकका कारण ठूलो संख्यामा मानिसहरूको ज्यान जान सक्ने चेतावनी दिएका छन्।
डब्लुएचओले पनि गजाको स्वास्थ्य क्षेत्रलाई धराशायी भएको वर्णन गरेको छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
