धादिङको थाक्रे गाउँपालिका-१ एक्लेफाटमा भारतीय ट्रकसँग गाडी ठोक्किँदा एक जनाको मृत्यु भएको छ।
काठमाडौंबाट पोखरा जाँदै गरेको प्र ३-०१-०२३ च ६५८ नम्बरको गाडी मध्यराति १२:०३ बजे एक्लेफाँटस्थित पृथ्वी राजमार्गमा सोही दिशाभर्फ गइरहेको युपी ३२ टिएन ४१९८ नम्बरको भारतीय गाडीको पछाडिको भागमा ठोक्किएर दुर्घटना भएको थियो।
दुर्घटनामा ललितपुरको बागमती गाउँपालिका-१ का ३४ वर्षीय थुलबाबु थिङको मृत्यु भएको जिल्ला प्रहरी कार्यालय धादिङका सूचना अधिकारी डिएसपी सुवास हमालले जानकारी दिए।
दुर्घटनामा गम्भीर घाइते भएका उनलाई उपचारका लागि काठमाडौंको ट्रमा सेन्टर पठाइएकोमा उपचारकै क्रममा बिहान १:५० बजे मृत्यु भएको डिएसपी हमालले जानकारी दिए।
गाडीमा चालकसहित पाँच जना सवार रहेकोमा अन्य सकुशल छन्।
दुर्घटनापछि भारतीय ट्रक फरार भएको थियो।
उक्त ट्रकलाई बिहान ५:५५ बजे धादिङकै बेनीघाट रोराङ गाउँपालिका-९ जोगीमारास्थित पृथ्वी राजमार्ग सडकखण्डबाट प्रहरीले नियन्त्रणमा लिएको डिएसपी हमालले जानकारी दिए।
प्रहरी चौकी जोगीमाराको टोलीले चेकिङका क्रममा उक्त ट्रकलाई नियन्त्रणमा लिएको थियो। ट्रक र चालक भारतको उत्तर प्रदेशको मोहमदपुरखलाका ४० वर्षीय कमलेशकुमार यादवलाई प्रहरीले नियन्त्रणमा लिएको छ।
ठोक्किएको गाडी र चालक रामेछापको मन्थली नगरपालिका-८ बस्ने ३४ वर्षीय अरुण कार्कीलाई पनि प्रहरीले नियन्त्रणमा लिएर दुर्घटनाबारे थप अनुसन्धान गरिरहेको डिएसपी हमालले जानकारी दिए।
-1746009348.jpg)
