कपिलवस्तुमा भरूवा बन्दुक पड्केर लाग्दा एक जनाको मृत्यु भएको छ।
दुईजना साथीसँग जंगलमा शिकार खेल्न गएका बुद्धभुमी नगरपालिका वडा नं. ९ गब्दहवाका २८ वर्षीय समुन्द्र गाहा मगरको बन्दुक पड्किएर लाग्दा मृत्यु भएको प्रहरीले जनाएको छ।
जिल्ला प्रहरी कार्यालय कपिलवस्तुका अनुसार साथीहरुसँग शिकार खेल्न जंगल गएका समुन्द्रलाई साथीले लगेको बन्दुक पड्किएर छर्राले लाग्दा मृत्यु भएको हो।
मृतक समुन्द्र आफ्नै गाउँका ३४ वर्षीय रामबहादुर थारु र ३६ वर्षीय कालु भन्ने राम थारु सँग गब्दहवादेखि करीब ६ किलोमिटर उत्तर तर्फ कपिलवस्तु र अर्घाखाँचीको सिमानामा रहेको बुद्ध यशोधरा सामुदायिक बनमा आइतबार शिकार खेल्न गएका थिए।
जंगल किनारमा पुग्दा गाडीको आवाज सुनेपछि भाग्दै गर्दा राम थारुले बोकेको बन्दुक पड्किएर समुन्द्रको खुट्टामा लागेको थियो। खुट्टामा गोली लागी अत्यधिक रक्तश्राव भएका समुन्द्रको उपचारको क्रममा भैरहवा मेडिकल कलेजमा मृत्यु भएको जिल्ला प्रहरी कार्यालय कपिलवस्तुले जनाएको छ।
घटनालगत्तै इलाका प्रहरी कार्यालय गोरुसिंगेबाट खटिएको प्रहरी टोलीले घटनामा संलग्न रहेको भन्दै ३ जनालाई पक्राउ गरेको छ। इलाका प्रहरी कार्यालय गोरुसिंगेका इन्चार्ज प्रहरी निरिक्षक विर बहादुर सुनारले समुन्द्रसँगै शिकार खेल्न गएका राम बहादुर थारु, कालु भन्ने राम थारु र हातहतियार लुकाउन सहयोग गर्ने प्रवेश थारुलाई पक्राउ गरिएको जानकारी दिए।
घटनामा संलग्नसँगै शिकार खेल्न प्रयोग भएका २ नाल भरुवा बन्दुक समेत बरामद गरिएको प्रहरीले जनाएको छ।
बरामद गरिएको एउटा बन्दुक फायर भएको अवस्थामा र अर्को लोड गरिएको अवस्थामा लुकाइ राखिएको अवस्थामा बरामद गरिएको प्रहरी निरिक्षक वीरबहादुर सुनारले जानकारी दिए। घटनाबारे थप अनुसन्धान भइरहेको उनले बताए।
-1746009348.jpg)
