प्रहरी नायब महानिरीक्षक (डिआइजी) पोखराज पोखरेल प्रहरी अतिरिक्त महानिरीक्षक (एआइजी) मा बढुवा सिफारिस भएका छन्।
नेपाल प्रहरी प्रधान कार्यालय महिला बालबालिका तथा जेष्ठ नागरिक सेवा निर्देशनालय नक्सालमा दरबन्दी भएका उनी हाल काठमाडौं उपत्यका ट्राफिक प्रहरी कार्यालय रामशाहपथमा प्रमुख छन्।
सोमबार बसेको बढुवा समितिको बैठकको निर्णयअनुसार डिआइजी पोखरेललाई एआइजीमा बढुवा सिफारिस गरिएको हो।
उनी हाल एआइजी रहेका उमेशराज जोशीको ठाउँमा बढुवा सिफारिस भएको नेपाल प्रहरीका केन्द्रीय प्रवक्ता डिआइजी दानबहादुर कार्कीले जानकारी दिए।
५६ वर्षे उमेर हदका कारण जोशी असार १८ गते रातिदेखि अनिवार्य अवकासमा जाँदैछन्। त्यसलगत्तै बढुवा हुने एआइजी पोषराज पोखरेल पनि दुई दिन मात्रै पदमा रहनेछन्।
उनी पनि उमेरहदकै कारण असार २० गते रातिदेखि अनिवार्य अवकासमा जानेछन्। प्रहरी नियमावली २०७१ अनुसार एआइजी र डिआइजीको ५६ वर्षमा उमेर हदले अवकास पाउनेछन्।
*शीर्षक सम्पादन गरिएको।
