पाल्पामा गाडी दुर्घटना हुँदा ९ जना घाइते भएका छन्।
पाल्पाको निस्दी गाउँपालिका-४ झ्यालिङस्थित कच्ची सडक खण्डमा बा १५ च ५९४ नम्बरक स्कारपिओ गाडी दुर्घटना हुँदा त्यसमा सवार ९ जना घाइते भएका हुन्।
उक्त गाडीमा शिविर सञ्चालनका लागि गएका टोली सहित अन्य व्यक्तिहरू चढेको पाल्पाका डिएसपी सुगन्ध श्रेष्ठले जानकारी दिए।
स्थानीय होराइजन डेन्टल अस्पताल रामपुर पाल्पाबाट भिरपानीमा डेण्टल सम्बन्धी शिविरमा गई उनीहरू रामपुर फर्कँदै थिए।
गाडी आफै अनियन्त्रित भई सडकको भित्तामा ठोक्किएको र चालकसहित ९ जना घाइते भएको प्रहरीले जनाएको छ।
घाइतेहरूमा पाल्पाको रामपुर नगरपालिका-५ की २१ वर्षीया डोल्मा खण्डाल, वडा नम्बर ९ की २८ वर्षीया रचना राना, वडा-५ की २० वर्षीया अनिषा सिंह ठकुरी, २३ वर्षीया ममता श्रेष्ठ, २० वर्षीया सबिना राना, वडा-४ की १९ वर्षीया श्रृया रूचाल, वडा-५ का १९ वर्षीया दीपा हिस्की मगर, चालक ३० वर्षीय मोहन अर्याल र ३४ वर्षीय शंकर श्रेष्ठ घाइते छन्।
उनीहरूलाई उपचारका लागि लुम्बिनी मेडिकल कलेजमा लगिएको छ।