बिहीबारदेखि भएको यसवर्षको एसइई परीक्षामा लुम्बिनी प्रदेशबाट ८३ हजार चारसय विद्यार्थी सहभागी हुँदैछन्।
लुम्बिनी प्रदेशका १२ जिल्लामा तोकिएका ३४० परीक्षा केन्द्रबाट विद्यार्थीले परीक्षा दिँदैछन्।
अघिल्लो वर्षको तुलनामा लुम्बिनीमा यसवर्ष दुईहजार २४ विद्यार्थी घटेका छन्। शिक्षा तथा सामाजिक विकास निर्देशनालय लुम्बिनीका अनुसार अघिल्लो वर्ष प्रदेशका १२ जिल्लाबाट ८५ हजार ४२४ विद्यार्थी सहभागी भएका थिए।
साधारणतर्फ ७७ हजार ३६४ र प्राविधिकतर्फ दुई हजार ९४६ गरी नियमिततर्फ ८० हजार ३१० र ग्रेडवृद्धिका लागि तीन हजार ९० गरी ८३ हजार ४ सय विद्यार्थीले परीक्षा दिन लागेका हुन्।
परीक्षामा सबैभन्दा धेरै रूपन्देहीबाट १९ हजार ६४८ र सबैभन्दा कम पूर्वीरुकुमबाट एक हजार ३० परीक्षार्थी सहभागी हुँदैछन्। शिक्षा तथा सामाजिक विकास निर्देशनालय लुम्बिनीका अनुसार दाङमा १२ हजार ८९८, बाँकेमा नौ हजार २६२, कपिलवस्तुमा नौ हजार ५८ परीक्षार्थीले परीक्षा दिँदै छन्।
त्यस्तै बर्दियामा सात हजार १३, पश्चिम नवलपरासीमा पाँच हजार ४४६, पाल्पामा चार हजार १८१, गुल्मीमा चार हजार ९७, प्यूठानमा तीन हजार ९८४, रोल्पामा तीन हजार ८११ र अर्घाखाँचीमा दुई हजार ९७२ विद्यार्थीले परीक्षा दिँदैछन्।