प्रधानमन्त्री केपी शर्मा ओलीले लोकतन्त्रका लागि लड्ने र जेलनेल सहितको यातना भोग्नेहरू संसदमै रहेको बताउँदै आफूहरूलाई यो प्रणाली ज्यानसरह प्रिय रहेको बताए। बुधबार प्रतिनिधि सभा बैठकमा बोल्दै प्रधानमन्त्री केपी शर्मा ओलीले लोकतन्त्रको जीवनको लागि आफूहरू कस्तै कष्ट सहन पनि तत्पर रहेको बताए।
‘लोकतन्त्रका लागि लड्ने र जेलनेल सहितको यातना भोग्ने हामी यहीँ छौं । हामीलाई यो प्रणाली ज्यान सरह प्रिय छ। यसको जीवनको लागि हामी कस्तै कष्ट सहन पनि तत्पर छौं । कति लोकतन्त्र मन नपर्ने पनि यहीँ हुन सक्छौं । कति लोकतन्त्रको सम्बर्द्धनका लागि हैन, त्यसको उपभोग गर्ने– त्यसको हुर्मत लिने अभिष्ट भएका पनि हुनसक्छौं, तिनीहरुबाट यो प्रणाली जोगाऔं,’ उनले भने।
ओलीले प्रतिनिधि सभा बैठकमा यसैलाई जोडेर सोलोमनको न्यायसम्बन्धी कथा पनि सुनाएका थिए।
‘अंग्रेजी साहित्यमा एउटा प्रसिद्ध कथा छ– सोलोमनको न्याय! दुई महिलाले एउटै बच्चालाई आफ्नो छोरो भएको दाबी गर्छन्। दावी–प्रतिदावीबाट हैरान सोलोमनले सबैलाई अचम्मित पार्ने फैसला सुनाउँछन्– यो बच्चालाई ठाडो चिरेर दुवै महिलाहरुलाई आधा–आधा दिनू! तीमध्ये एउटी महिला आधा भए पनि ठीकै छ भन्छिन्, तर अर्की आत्तिँदै र रुँदै भन्छिन्, ‘भो! मलाई चाहिएन। बच्चा उसैलाई देऊ, तर मर्न नदेऊ !’ त्यसपछि न्यायमूर्ति सोलोमनले तिनै महिला साँचो आमा भएको थाहा पाउँछन् र बच्चा उसैलाई दिन्छन्,’ ओलीले कथा हाल्दै भने।
-1746009348.jpg)
