नेपाली कांग्रेसका सहमहामन्त्री जीवन परियारले पार्टीको अगुवाइमा संविधान संशोधन समिति गठन गरिनुपर्ने बताएका छन्।
कांग्रेस र एमालेबीच २०८१ असार १७ गते भएको ७ बुँदे सहमतिमध्ये सरकार बनाउनेबाहेक अरू कार्यान्वयनमा नआएकोतर्फ संकेत गर्दै सहमहामन्त्री परियारले संविधान संशोधनका लागि पार्टीकै नेताको संयोजकत्वमा समिति गठनको प्रस्ताव गरेका हुन्।
आइतबार सानेपामा बसेको केन्द्रीय कार्यसमिति बैठकमा बोल्दै उनले भने, ‘संविधानको धारा ७२ को उपधारा २ अनुसार सरकार बनाउनेलगायत ७ बुँदे सहमति गरे पनि सरकार बनाउनेबाहेक अरू बुँदा कार्यान्वयनमा आउन सकेको छैन। संघीय संसदमा प्रतिनिधित्व गर्ने पार्टीकै एक वरिष्ठ नेताको संयोजकत्वमा संविधान संशोधन समिति बनाऔं।’
उनले ५२ पदाधिकारी नियुक्तिबारेको मुद्दामा हालै सर्वोच्च अदालतले गरेको फैसलालाई पनि नजिकबाट नियाल्नुपर्ने बताए।
‘सर्वसाधारण जनताले पनि न्यायलयबाट पनि न्याय भएन भनेर सामाजिक सञ्जालमा भन्न थाले,’ उनले भने, ‘यसमा सबैको चासो भएको छ, सभापतिमार्फत केन्द्रीय समितिको ध्यानाकर्षण गराउँछु, यसलाई नजिकबाट नियाल्नुपर्छ।’
-1746009348.jpg)
