नेपाली कांग्रेसका प्रवक्ता प्रकाशशरण महतले कम्तीमा ५० प्रतिशत प्रभाव राख्ने हिसाबले नेपाली कांग्रेस गठबन्धन सरकारमा सामेल भएको बताएका छन्।
आइतबार सानेपामा बसेको केन्द्रीय कार्यसमिति बैठकमा गठबन्धन सरकारबारे धारणा राख्दै उनले भने, ‘गठबन्धन सरकार हो, बस्दा पनि गारो, नबस्दा पनि गारो तर सरकारमा बसेपछि कम्तीमा ५० प्रतिशत प्रभाव राख्ने हिसाबले हामी बसेका हौं।’
उनले सरकारमा रहेका कांग्रेस मन्त्रीहरूको प्रदर्शन अरू दलका मन्त्रीभन्दा उत्कृष्ट देखिनुपर्ने र त्यसले जनतामा सन्देश दिनुपर्ने बताएका थिए।
महतले प्रदेश सरकारहरूमा नेतृत्वको कमजोरी रहेको बताउँदै प्रदेश संरचनाको प्रभावकारितामाथि प्रश्न उठाएका छन्।
‘प्रदेशमा सिनियर नेताको अभाव छ, अराजकता बढेको छ। यदि यसरी नै गयो भने प्रदेश संरचनाप्रति नै जनविश्वास हराउने खतरा छ,’ महतले भने।
उनले पार्टीको जनाधार खस्किँदै गएकोप्रति गम्भीर ध्यान दिन पनि जोड दिएका छन्। पार्टीको ऐतिहासिक परम्परा, धर्म, संस्कृति, सभ्यता र मूल विचारमा आधारित मतदाता वर्गलाई जोगाउन नसके आगामी २०८४ को निर्वाचनमा कांग्रेस कमजोर हुने उनको भनाइ छ।
उनले पार्टीले आफ्ना मूल मूल्य–मान्यता, विशेषगरी धार्मिक र सांस्कृतिक पहिचानलाई स्पष्ट र मजबुत रुपमा प्रस्तुत नगरे गम्भीर क्षति हुने दाबी गरेका थिए।
‘हामी हिन्दू, बौद्ध, किराँत, प्राकृतिक पुजक धर्म संस्कृति मान्ने जनताको प्रतिनिधित्व गर्छौं। यही नै पार्टीको राइट टु द सेन्टर हो । कम्युनिस्टहरू धर्मलाई अस्वीकार गर्छन् । तर हामी आस्थावान् छौं। यही हाम्रो पार्टीको आधार हो, र यसको संरक्षण गर्नुपर्छ,’ उनले भने।
-1746009348.jpg)
