उपप्रधान तथा अर्थमन्त्री विष्णु पौडेलले दुई वर्ष भित्र मुलुकभरिका सबै भूमिहीन दलित, भूमिहीन सुकुम्वासी र अव्यवस्थित बसोबासी लाई ०८४ भित्र जग्गाधनी प्रमाण पूर्जा वितरण गरिसक्ने दाबी गरेका छन्।
आइतबार रूपन्देहीको कञ्चन गाउँपालिकाका झन्डै ५०० परिवारलाई एकसाथ लालपुर्जा वितरण गर्दै उपप्रधानमन्त्री पौडेलले आगामी निर्वाचनसम्म कांग्रेस र एमालेको सरकार कायम रहने र यही सरकारले देशभरिका भूमिहीनहरूलाई लालपुर्जा वितरण गर्ने बताएका हुन्।
कञ्चन गाउँपालिकामा विगत ४२ वर्षदेखि बसोबास गरी जग्गाको जोत भोग र उपभोग गर्दै आए पनि लालपुर्जा पाएका थिएनन्। उनीहरूलाई आइतबार लालपुर्जा वितरण गरिएको हो।
उपप्रधानमन्त्री पौडेलले कञ्चन गाउँपालिका वडा नंं ५ गरगरेका बासिन्दालाई भूमि समस्या समाधान आयोगका केन्द्र र जिल्लाका पदाधिकारी तथा मालपोतका सम्बन्धित अधिकारीहरूको रोहबरमा गरगरेका ९८ वर्षीय भानुभक्त उपाध्यायलाई जग्गाधनी पुर्जा हस्तान्तरण गरी कार्यक्रमको शुभारम्भ गरेका थिए।
सो अवसरमा बोल्दै पौडेलले अहिलेसम्म जग्गाको नाप जाँच गर्ने र लालपुर्जा बनेकाहरूलाई भूमि समस्या समाधान आयोग मार्फत वितरण भइरहेको उल्लेख गर्दै बाँकी रहेका लालपुर्जा पनि प्रदान गर्ने प्रक्रियामा रहेको बताए।
नेकपा एमालेका उपाध्यक्ष समेत रहेका अर्थमन्त्री पौडेलले नकारात्मक सोचको पछाडि लागेर समाजलाई नकारात्मक दिशातर्फ नधकेल्न आग्रह गरे। समाजमा भएका कामहरू पनि नदेख्ने प्रवृत्ति हाबी हुँदै गएकाले यसलाई चिरेर अगाडी बढ्नुपर्ने पौडेलले बताए।
कार्यक्रममा बोल्दै भूमि समस्या समाधान आयोगका केन्द्रीय अध्यक्ष हरिप्रसाद रिजालले आयोगले देशव्यापी रूपमा सुकुम्वासीहरूको लगत सङ्कलन गरिरहेको र ठाउँ ठाउँमा पुर्जा वितरण भइरहेको बताए।
प्रतिनिधिसभा सदस्य वासुदेव घिमिरेले सुकुम्वासी समस्या दिगो रूपमा समाधान गर्ने गरी सरकार अगाडी बढेको उल्लेख गर्दै सरकारको कामलाई नागरिकहरूले साथ दिनुपर्ने बताए।
भूमि समस्या समाधान आयोग रुपन्देहीका अध्यक्ष कुमार थापाले रुपन्देहीमा कञ्चन गाउँपालिकाबाट लालपुर्जा बाँड्ने कामको सुरुवात भएको र अब क्रमशः अन्य पालिकाहरूमा पनि भूमिहीन दलित, भूमिहीन सुकुम्वासी र अव्यवस्थित बसोबासीलाई पुर्जा वितरण गर्दै जाने बताए। रुपन्देहीमा छिट्टै नै सुकुम्वासीको समस्या समाधान गर्ने गरी आयोगले काम गरिरहेको उनले दाबी गरे।
गाउँपालिकाका अध्यक्ष नवराज ढकाल र उपाध्यक्ष मौसमी थापाले कञ्चनभित्र सुकुम्वासीहरूको समस्या तथा अन्य वस्तुस्थितबारे जानकारी गराएका थिए।
भूमि समस्या समाधान आयोग रुपन्देहीका अध्यक्ष थापाका अनुसार रुपन्देहीमा हालसम्म कञ्चनसँगै देवदह नगरपालिकामा झन्डै एक हजार चार सय परिवारलाई लालपुर्जाको राजश्व बुझाउन सूचना गरिसकिएको छ भने बाँकी परिवारको जग्गाको नाप जाँचको काम भइरहेको छ। त्यस्तै तिलोत्तमा नगरपालिकामा पनि १२३ परिवारलाई लालपुर्जाको लागि सूचना गरिएको छ भने ९१५ वटा लालपुर्जाको सूचना निकाल्ने तयारी गरिएको छ।
थापाले सैनामैना नगरपालिकामा पनि झन्डै ३ सय लालपुर्जाको राजश्व बुझाउन सूचना सार्वजनिक गरिएको जानकारी दिए। सैनामैनामा नाप जाँच गरेका बाँकी १ हजार ६ सय ६० परिवारलाई पनि राजश्व सङ्कलनको लागि सूचना सार्वजनिक गर्ने तयारी गरिएको उनले बताए।
-1746009348.jpg)
