नेकपा (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपालले नेकपा (एमाले) संकट नै संकटले ग्रस्त भएको बताएका छन्।
पार्टी केन्द्रीय कार्यालय आलोकनगरमा शुक्रबार भएको कार्यक्रममा बोल्दै उनले नेपालको राजनीतिमा मुल कम्युनिष्ट पार्टी भनिएको एमाले अहिले निकै संकटले ग्रस्त भएको बताए।
‘नेपालको राजनीतिमा मुल कम्युनिष्ट पार्टी भनिएको एमाले अहिले निकै संकटले ग्रस्त भएको छ। संकटले ग्रस्त भएको छ। अन्तरविरोध बढ्दै गइरहेको छ। अब त्यसको भविष्य के हुने हो त्यति सजिलै गरी भन्न सकिने अवस्था छैन। म त्यो पार्टीको आन्तरिक कुरामा धेरै प्रवेश गर्न चाहन्न तर म के भन्छु भने यो कुभलो चिताउने, कुभलो गर्ने, अनुचित काम गर्ने, व्यक्तिवादको प्रवृत्रिको शिकार हुने, निम्न पुँजीवादी प्रवृत्ति मात्रै होइन, दक्षिण अवसरवादी प्रवृत्तिमा चुर्लुम्म डुब्ने यस्ता जुनसुकैले प्रवृत्ति बोकेका छन्, भने यो प्रवृत्ति परास्त गर्नैपर्छ,’ उनले भने।
अध्यक्ष नेपालले कम्युनिष्टहरूको भविष्य अझै रहेको बताए।
साथै उनले अहिले देशको राजनीतिक अवस्था हेर्दा सरकारले मुलुकलाई राम्रोसँग हाँक्न नसकेको दाबी गरे। सरकारले जनभावनालाई बुझ्न र जनचाहनाको सम्मान गर्न नसकेको उनको भनाइ छ।
‘अहिले हाम्रो देशको राजनीतिक अवस्थालाई चर्चा गर्ने हो भने सरकारले मुलुकलाई राम्रोसँग हाँक्न सकेको छैन। जनभावनालाई बुझ्न सकेको छैन। जनचाहनालाई सम्मान गर्न सकेको छैन। सही नीति अवलम्बन गर्न सकेको छैन। जनताका पीडा, वेदनालाई सम्बोधन गर्न पनि सकेको छैन। त्यसो हुनाले यो सरकारले जनताको विश्वास पनि जित्न सक्दैन, जनचाहना बमोजिम परिणाम दिने कुनै पनि अवस्था छैन। यो सरकार जनमुखी होइन, जनविरोधी हो। यस्तो सरकार जुन सुशासनको पक्षधर होइन, कुशासनको पक्षपोषक हो। यस्तो सरकारलाई हामीले साथ दिने कुरै आउँदैन। यसको पतन अनिवार्य छ। खालि हामीले समय पर्खिनुपर्ने हुन्छ। आत्तिनुपर्ने केही आवश्यकता छैन,’ उनले भने।
उनले नबिराउनु, नडराउनु भन्ने आफ्नो एउटा मान्यता रहेको पनि बताए।
‘मेरो एउटा मान्यता छ, नबिराउनु, नडराउनु। बिराएको छैन भने डराउनुपर्ने कुनै आवश्यकता छैन। यस धर्तीका एक जना मान्छेले पनि माधव नेपालले भ्रष्टाचार गरेको छ भनेर तथ्य प्रमाण प्रस्तुत गरोस्, जुनसुकै बलिदान गर्न म तयार हुनेछु। म अनुचित कुराको कहिल्यै पनि पक्षमा रहन्न। म जहिले पनि अनुशासन, नियम, विधिको पालना गर्ने, प्रक्रियालाई सम्मान गर्ने, राम्रो संस्कृति र संस्कारमा जोड दिने, कहिले पनि बदलाको भावनाबाट नहिँड्ने सकेसम्म सबैलाई समेटेर लैजाने सोच भएको मान्छे हुँ,’ उनले भने।
(न्युज एजेन्सी नेपाल)
-1746009348.jpg)
