पत्रकार दिलभूषण पाठकविरूद्ध साइबर अपराधको मुद्दा दर्ता भएको छ।
जिल्ला सरकारी वकिलको कार्यालय काठमाडौंले सोमबार जिल्ला अदालत काठमाडौंमा उनीविरूद्ध मुद्दा दर्ता गरेको सहन्यायाधिवक्ता रामहरि शर्मा काफ्लेले सेतोपाटीलाई जानकारी दिए।
‘आज मुद्दा दर्ता भएको हो,’ उनले भने।
नेपाल प्रहरीको साइबर ब्युरोले असार १३ जिल्ला सरकारी वकिलको कार्यालयमा अनुसन्धान प्रतिवेदन बुझाएको थियो।
पाठकलाई पक्राउबिनै मुद्दा दर्ता गरिएको हो।
गत जेठ २८ गते पत्रकार पाठकविरूद्ध पक्राउ पुर्जी जारी भएको थियो। उनीविरूद्ध विद्युतीय कारोबार ऐन २०६३ अन्तर्गतको कसुरमा पक्राउ पुर्जी जारी भएको थियो।
पाठकले केही समयअघि ‘टफ टक विथ दिलभूषण पाठक’ नामको युट्युब च्यानलमार्फत हिलटन होटल र नेपाली कांग्रेसका सभापति शेरबहादुर देउवाका छोरा जयवीर देउवाबारे भिडिओ रिपोर्ट प्रसारण गरेका थिए।
त्यही भिडिओबारे उजुरी परेपछि उनीविरूद्ध ब्युरोले पुर्जी लिएको थियो।
असार ५ गते उच्च अदालत पाटनले पत्रकार पाठकलाई पक्राउ नगर्न भनेको थियो। पत्रकारले सम्प्रेषण गरेका सामग्रीबारे प्रेस काउन्सिलमा उजुरी दिन सक्ने व्यवस्था भएकोले विद्युतीय कारोबारसम्बन्धी कसुरमा पाठकमाथि अनुसन्धान गर्नु नपर्ने उच्च अदालतले भनेको थियो।
त्यसअघि असार २ गते उच्च अदालत पाटनले पत्रकार पाठकलाई पक्राउ नगर्न अल्पकालीन अन्तरिम आदेश दिएको थियो। पत्रकार पाठकविरूद्ध कसले उजुरी दिएको हो भन्ने खुलेको छैन। अभियोग पत्रमा उजुरी दिनेको परिवर्तित नाम राखिएको छ।
-1746009348.jpg)
