राष्ट्रिय स्वतन्त्र पार्टी (रास्वपा) संसद अवरोधबारे आन्तरिक छलफलमा जुटेको छ।
भिजिट भिसा प्रकरणमा गृहमन्त्री रमेश लेखकमाथि नै छानबिन हुनुपर्ने माग राख्दै रास्वपाले निरन्तर संसद बैठक अवरोध गर्दै आएको छ। सोमबार राति बसेको मन्त्रिपरिषद् बैठकले भिजिट भिसा प्रकरणबारे छानबिन गर्न पूर्वमुख्यसचिव शंकरदास बैरागीको नेतृत्वमा छानबिन समिति बनाउने निर्णय गरेको छ।
रास्वपाले उक्त समिति झारा टार्ने प्रकृतिको रहेको प्रारम्भिक प्रतिक्रिया दिएको छ। यद्यपि यसबारे उसले अहिले छलफल गरिरहेको छ।
‘भिजिट भिसामार्फत् मानव तस्कर जस्तो संगठित अपराधबारे उठेको मुद्दासँग सम्बन्धित सरकारले बनाएको समिति सम्बन्धी पार्टीको धारणा बनाउनको लागि राष्ट्रिय स्वतन्त्र पार्टीका सांसदहरू आन्तरिक छलफलमा छौं,’ रास्वपाका प्रवक्ता मनिष झाले भने।
उनले दलको तर्फबाट धारणा सदनको बैठकमै दिने पनि बताए।
आजको बैठकमा अर्थमन्त्री पौडेलले ‘आर्थिक विधेयक, २०८२ र ‘राष्ट्र ऋण उठाउने विधेयक, २०८२ माथि विचार गरियोस्’ भनी प्रस्ताव प्रस्तुत गर्ने तालिका रहेको संघीय संसद् सचिवालयले जनाएको छ।
त्यसअघि बैठकले श्रम, रोजगार तथा समाजिक सुरक्षा, गृह, सञ्चार तथा सूचना प्रविधि, अर्थ र सहरी विकास मन्त्रालय, प्रधानमन्त्री तथा मन्त्रिपरिषद्को कार्यालय, राष्ट्रिय योजना आयोग, राष्ट्रपतिको कार्यालय एवं उपराष्ट्रपतिको कार्यालयका विभिन्न शीर्षकमाथिको छलफलमा उठेका प्रश्नको सम्बन्धित मन्त्रीले जवाफ दिने कार्यक्रम छ।
बैठकमा सांसदहरू अमरेशकुमार सिंह, प्रभु साह, दुर्गा राई, प्रेम सुवाल, अमनलाल मोदी, जनार्दन शर्मा, विमला सुवेदी, रेखा शर्मा, चित्रबहादुर केसी, शक्तिबहादुर केसी, हितराज पाण्डे, रामकुमार राई, देवेन्द्र पौडेल, माधव सापकोटा, रणेन्द्र बराली, ज्ञानु बस्नेत, उर्मिला माझी, अम्मरबहादुर थापा, छिरिङल्हामु लामा (तामाङ), नारायणी शर्मा, गङ्गा कार्की र लेखनाथ दाहालद्वारा प्रस्तुत खर्च कटौतीको प्रस्तावलाई निर्णयार्थ प्रस्तुत गर्ने कार्यसूची छ।
