प्रमुख प्रतिपक्षी नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' ले सदन खुलाउनेबारे तीन दलबीच सहमति भएको बताएका छन्।
उनले अब प्रतिनिधि सभा बैठक सञ्चालन हुने पनि बताए।
नेपाली कांग्रेस, नेकपा (एमाले) र नेकपा (माओवादी केन्द्र) बीच आज दुई बुँदे सहमतिमा हस्ताक्षर भएको थियो।
सहमितको पहिलो बुँदामा 'भिजिट भिसा र अध्यागमनसँग सम्बन्धित विषयका सम्बन्धमा अख्तियार दुरूपयोग अनुसन्धान आयोगले अनुसन्धान गरिरहेको छ। उक्त कार्यलाई अस्तियार दुरूपयोग अनुसन्धान आयोगले निष्कर्षमा पुयाउने नै छ। उक्त विषयका सम्बन्धमा छानबिनका लागि आयोगले माग गरेबमोजिम नेपाल सरकारले आवश्यक सहयोग गर्नेछ' लेखिएको छ।
साथै सहमतिको दोस्रो बुँदामा 'अध्यागमन र भिजिट भिसाको सम्बन्धमा विगतदेखि देखिएका समस्या समाधान गर्न नेपाल सरकारले आवश्यक अध्ययन एवं छानबिन गरी नीतिगत, कानूनी र संरचनात्मक सुधारका लागि उपयुक्त व्यवस्था गर्न ठोस पहल गर्ने प्रतिबद्धता नेपाल सरकारले व्यक्त गर्ने' भन्ने उल्लेख छ।
सत्ता र प्रतिपक्षीबीच सहमतिमा हस्ताक्षर भएको हो।
यो सहमतिमा रास्वपाले हस्ताक्षर गरेको छैन। रास्वपाले भिजिट भिसा प्रकरणमा गृहमन्त्री रमेश लेखकको राजीनामा र छानबिन समितिको अडान छाडेको छैन।
यस विषयमा रास्वपा केही समय आफ्नो ढंगले अघि बढ्ने भए पनि आरोप-प्रत्यारोप भने नहुने अध्यक्ष प्रचण्डले बताए। रास्वपा र अध्यक्ष प्रचण्डबीच आज छलफल पनि भएको थियो।
