काठमाडौं महानगरपालिकाका मेयर बालेन शाहले चारवटा विषयगत समितिमा नयाँ संयोजक तोकेकामा तीमध्ये तीन जनाले आफूहरू जिम्मेवारी वहन नगर्ने भन्दै पत्र पठाएका छन्।
आइतबार वडा नम्बर ५ का अध्यक्ष वीरेन्द्र प्रजापति, वडा नम्बर ३० का अध्यक्ष दलबहादुर कार्की र वडा नम्बर ८ का अध्यक्ष विनोदकुमार राजभण्डारीले संयुक्त हस्ताक्षर गर्दै कार्यपालिकाले जिम्मेवार अनुमोदन नगरेको भन्दै मेयर बालेनलाई पत्र पठाएका हुन्।
'मेयरले संयोजकको जिम्मेवारी दिएपछि नबस्ने भन्ने कुरा हुँदैन। तर यो कार्यपालिकाबाट अनुमोदित हुनुपर्छ,' प्रजापतिले भने, 'तोकिँदैमा बस्न नमिल्ने भएर हामीले मेयरलाई पत्र पठाएका हौं।'
यस्तै एउटा समितिको सदस्य भएको व्यक्तिलाई अर्को समितिको संयोजक नियुक्त गर्न नमिल्ने उनले बताए।
'म पहिलेदेखि नै सम्पदा तथा पर्यटन समितिको सदस्य थिएँ। अहिले मलाई यही समितिको संयोजक नियुक्त गरिएको छ,' उनले भने, 'तर सूचना प्रविधि र सुशासन समितिको सदस्य नै नभएको व्यक्तिलाई उक्त समितिको संयोजक तोकिएको थियो। यसो गर्न मिल्दैन।'
प्रजापतिका अनुसार त्यस बेला संयोजक नियुक्त गर्दा काठमाडौं महानगरपालिका नगर कार्यपालिका कार्यसम्पादन नियामावली २०७४ थियो र सोही अनुसार संयोजक नियुक्त भएको थियो। अहिले भने विषयगत समिति कार्यविधि २०८० ले अधिकार कार्यपालिकालाई दिएको उनले बताए।
मेयर बालेनले बिहीबार सूचना प्रविधि समिति, सुशासन समिति, सम्पदा तथा पर्यटन समिति र विधायन समितिका संयोजकको जिम्मेवारी हेरफेर गरेका थिए।
वडा नम्बर १७ का अध्यक्ष नवीन मानन्धरलाई सूचना प्रविधि समितिको संयोजकबाट हटाएर वडा नम्बर ५ का अध्यक्ष वीरेन्द्र प्रजापतिलाई दिइएको थियो। वडा नम्बर २६ का अध्यक्ष ख्यामराज तिवारीलाई सुशासन समितिको जिम्मेवारीबाट हटाएर वडा नम्बर ३० का अध्यक्ष दलबहादुर कार्कीलाई राखिएको बालेनको सचिवालयले जनाएको थियो।
यसैगरी वडा नम्बर ८ का अध्यक्ष आशामान संगत सम्पदा तथा पर्यटन समितिका संयोजक थिए। उक्त समितिको संयोजक वडा नम्बर २४ का अध्यक्ष विनोदकुमार राजभण्डारी बनाइएको छ। वडा नम्बर २३ का अध्यक्ष मचाराजा महर्जन विधायन समितिका संयोजक थिए। उक्त समितिको नयाँ संयोजक वडा नम्बर १६ का अध्यक्ष रोजिना श्रेष्ठलाई तोकिएको थियो।
