नागरिक उन्मुक्ति पार्टीले सुदूरपश्चिम प्रदेश सरकारमा रिक्त रहेको पर्यटन, उद्योग, वन तथा वातावरण मन्त्रीमा नाम पठाएको छ।
नाउपाले सांसद रामेश्वर चौधरीलाई मन्त्री बनाउन मुख्यमन्त्री कमलबहादुर शाहलाई नाम दिएको हो।
मुख्यमन्त्री शाहले रिक्त मन्त्री पदमा चौधरीलाई नियुक्त गर्न प्रदेश प्रमुखसमक्ष सिफारिस गरेका छन्।
प्रदेश प्रमुख कार्यालयका प्रवक्ता दीर्घराज भट्टले नयाँ मन्त्रीको शपथ आइतबार अपराह्न ५ बजे हुने सेतोपाटीलाई बताए।
नाउपाले विवादका बीच मन्त्रीको नाम मुख्यमन्त्रीलाई दिएको थियो।
नाउपा सुदूरपश्चिम संसदीय दलले यसअघि मन्त्रीमा पठाउने नाम टुंग्याउन केन्द्रमा पत्राचार गरेको थियो। पार्टी अध्यक्ष रञ्जिता श्रेष्ठले प्रदेश संसदीय दलको आग्रहअनुसार कैलाश चौधरीको नाम दिएकी थिइन्।
तर प्रदेश संसदीय दलले केन्द्रले पठाएको नामबारे निर्णय गरेन। बरूं संसदीय दलको बैठक बसेर संसदीय दलका नेता घनश्याम चौधरीलाई मन्त्री बनाउने प्रस्ताव गर्यो।
शुक्रबार बसेको अनौपचारिक बैठकले पनि त्यही निष्कर्ष निकालेको थियो।
तर दलका नेताले रामेश्वरको नाम पठाएपछि नाउपाभित्रको विवाद उत्कर्षमा पुगेको छ।
यसविरूद्ध सांसद खुशीराम चौधरी अदालत जाने बताएका छन्। उनले मुख्मन्त्री कमल शाहलाई पत्र पठाएर दलले निर्णय नै नगरेको व्यक्तिलाई मन्त्री नबनाउन आग्रह गरेका थिए।
मुख्यमन्त्रीले दलका नेताले पठाएको पत्रलाई आधिकारिकता दिएपछि यसविरूद्ध खुशीराम चौधरीले अदालत जाने बताएका छन्।
‘दलका बहुसंख्यक सांसदको भावनाविपरीत, छलफल नै नगरिएको नाममा कसरी निर्णय हुन्छ। रामेश्वर माननीयलाई मन्त्री बनाउने निर्णय कतै भएको छैन,’ उनले भने, ‘यसविरूद्ध म अदालत जान्छु। विधिको शासन स्थापित गर्न लाग्छु।’
रामेश्वर यसअघि पनि मन्त्री बनेका थिए। कैलाश भने राज्यमन्त्री थिए।
अध्यक्ष रञ्जिताको चाहना कैलाशलाई नै फुल मन्त्री बनाउने थियो। तर संरक्षक रेशम चौधरीले रामेश्वरको नाममा निर्णय गर्न भनेपछि घनश्यामले संरक्षकको चाहना सदर गरिदिएको नाउपाका सांसद बताउँछन्। घनश्याम र रामेश्वर दुवै रेशम चौधरी पक्षका हुन्।
यसअघि मन्त्री रहेका लक्ष्मणकिशोर चौधरीको विवादित अडियो सार्वजनिक भएपछि उनले पदबाट राजीनामा दिएका थिए।
