प्रधानमन्त्री एवम् नेकपा (एमाले)का अध्यक्ष केपी शर्मा ओलीले युवाहरूलाई एकैचोटी माथिका पदहरू नताक्न आग्रह गरेका छन्।
शनिबार पार्टी केन्द्रीय कार्यालय च्यासलमा आयोजित पार्टी प्रवेश कार्यक्रममा बोल्दै प्रधानमन्त्री ओलीले बिनाअनुभव एकैचोटी माथिका पदहरू नताक्न अनुरोध गरेका हुन्।
एमाले देशलाई नयाँ बाटोमा नयाँ गतिका साथ अगाडि बढाउने पार्टी भएकाले त्यसमा अनुभव र पहिचान लगायतका अनेकौं पाटो महत्त्वपूर्ण हुने बताए।
अहिले 'पुरानो' भन्ने ट्रेन्ड चलिरहेको बताउँदै प्रधानमन्त्री ओलीले त्यसप्रति पनि आलोचना गरेका छन्।
'यो २० वर्ष गाडी हाँकिसकेछ। पुरानो भइसक्यो अब के हाँक्छ। मैले अस्ती एक महिनाअघि सिकेको छु म चलाउँछु भनेर कसैले भन्यो वा सिक्दै सिकेको छैन तर म चलाउँछु भन्यो भने गफ मात्रै हुन्छ,' प्रधानमन्त्री ओलीले भने।
उनले २० वर्ष चलाइसकेको मान्छेले धेरै अफ्ठ्यारो र असहज परिस्थितिको सामना गरेर देश कसरी चलाउने भनेर सिद्धहस्तता प्राप्त गरिसकेको हुन्छ भने नयाँलाई समय लाग्ने बताए।
उनले यसमा फुटबलको पनि उदाहरण दिए।
'मेसीलाई आउट गरेर म मैदानमा पस्छु, खेल्न थालेपछि सिकिहालिन्छ नि। म त्यस्तो खेलाडी हुन नसक्ने भन्ने हुन्छ भन्न थालियो भने त्यो अलि हुँदैन। मेसी एक दिनमा बन्दैन। एम्बाप्पे एकदिनमा बन्दैन,' उनले भने।
-1746009348.jpg)
