उच्च अदालत पोखराले राष्ट्रिय स्वतन्त्र पार्टी (रास्वपा) का सभापति रवि लामिछाने र पूर्वडिआइजी छविलाल जोशीलाई सुनुवाइबारे जानकारी गराउन आदेश गरेको छ।
शुक्रबार उच्च अदालत पोखराका मुख्यन्यायाधीश रत्नबहादुर बागचन्द र न्यायाधीश मिलन राईको इजलासले लामिछाने र जोशीलाई सुनुवाइ भइरहेको जानकारी गराउन आदेश दिएको हो।
इजलासले यसबारे निवेदन/प्रतिवेदन शाखालाई यसबारे जानकारी गराउन आदेश गरेको हो।
आरती गुरूङ, मिना गुरूङ, रामबहादुर खनाल, लिला पछाई र कृष्णबहादुर गुरूङको हकमा सुनुवाइलाई निरन्तरता दिने पनि आदेशमा उल्लेख छ। अर्को पेसी जेठ ४ गते (आइतबार) हेर्दाहेर्दैमा राख्न आदेश दिएको हो।
‘प्रतिवादीहरूमध्येका रवि लामिछाने र छविलाल जोशीको तर्फबाट विद्वान् वरिष्ठ कानुन व्यवसायीहरूले प्रतिवादीहरू हाल अन्य मुद्दाको सन्दर्भमा कारागार कार्यालय रूपन्देहीमा थुनामा रहेको भनी जानकारी गराउनु भएको सन्दर्भलाई विचार गरी रवि र छविलाललाई सुनुवाइको जानकारी छिटो माध्यमबाट सम्बन्धित कारागार कार्यालयमार्फत पठाई,’ आदेशमा भनिएको छ, ‘निवेदक प्रतिवादीहरू आरती गुरूङ, मिना गुरूङ, रामबहादुर खनाल, लिला पछाई र कृष्णबहादुर गुरूङका हकमा सुनुवाइलाई निरन्तरता दिने गरी प्रस्तुत प्रतिवेदनलाई जेठ ४ गतेको हेर्दाहेर्दैको पेसीमा तोकी नियमानुसार पेस गर्नू।’
जिल्ला अदालत कास्कीले सूर्यदर्शन बचत तथा ऋण सहकारीको ठगी आरोपमा लामिछानेसँग ६५ लाख र जोशीलाई ८८ लाख धरौटी माग गरेको थियो।
उक्त आदेशविरूद्ध लामिछाने, जोशी लगायतले उच्च अदालत पोखरामा बेरितको आदेश बदर गरिपाऊँ भन्दै निवेदन दर्ता गराएका थिए। सरकारी वकिलले पनि धरौटीमा रिहा गर्दा बिगोभन्दा निकै कम धरौटी माग गरेको भन्दै थुनामा पठाउन आदेश दिएको थियो।
-1746009348.jpg)
