प्रमुख प्रतिपक्षी दल नेकपा (माओवादी केन्द्र)की सांसद रेखा शर्माले सरकारले लामो समयसम्म गभर्नर नियुक्त गर्न नसक्दा मुलुककै बेइज्जत भएको बताएकी छन्।
बुधबार प्रतिनिधि सभाको शून्य समयमा बोल्दै सांसद शर्माले दुई तिहाइको बलियो सरकार भने पनि लामो समयसम्म गभर्नर नियुक्त गर्न नसक्नु देशकै लागि दुर्भाग्यको कुरा रहेको बताएकी हुन्।
'गभर्नरको नियुक्ति नभएर समितिकै सदस्यले राजीनामा दिएको भन्ने विषय बाहिर आइरहेको छ । यस्तो अवस्थामा यो दुई तिहाइको यति बलियो सरकारले एउटा गभर्नर नियुक्त गर्न नसक्नुको कारण जान्न चाहन्छु,' उनले भनिन्।
उनले देशलाई ग्रे लिस्टबाट मुक्त गर्नुपर्ने र अर्थतन्त्रको सबलीकरण गर्नुपर्ने बेलामा गभर्नर नै नियुक्त नगरिएको भनेर आलोचना जनाइन्।
सरकारमा आबद्ध दलहरूको दलगत स्वार्थ नमिल्दा वा अरू विभिन्न कारणले गभर्नर नियुक्त हुन नसकेको भन्ने विषय बाहिर आएको पनि सांसद शर्माले बताएकी छन्।
'त्यसकारण राष्ट्रको बेइजत नगर्न र सक्षम तथा योग्य व्यक्तिलाई गभर्नर नियुक्त गर्न सरकारलाई आग्रह गर्दछु,' उनले भनिन्।
