राष्ट्रिय प्रजातन्त्र पार्टी (राप्रपा) का सांसद ज्ञानेन्द्र शाहीले प्रतिनिधि सभाको मंगलबारको बैठकमा नेपाली कांग्रेसका दुई महामन्त्रीलाई खोजे।
कांग्रेका महामन्त्रीद्वय गगन थापा र विश्वप्रकाश शर्मा नीति तथा कार्यक्रम छलफलमा प्रतिनिधि सभामा उपस्थित नभएको उनको भनाइ छ।
सरकार संसदप्रति जबाफदेही हुनुपर्नेमा नभएकोले संसदको महत्त्व घट्दै गएको दाबी राप्रपा प्रमुख सचेतकसमेत रहेका शाहीको थियो।
‘तर एउटा आश्चर्य कुरा- मेरो पार्टीभन्दा परको कांग्रेसतिर गएँ म। नेपाली कांग्रेसमा दुई जना शसक्त युवा नेता हुनुहुन्छ, महामन्त्रीद्वय गगन थापा र विश्वप्रकाश शर्मा। उहाँहरू नीति तथा कार्यक्रम छलफलमा कहीँ पनि देखिनुभएन,’ सांसद शाहीले भने, ‘यो संसदको सबैभन्दा ठूलो दल हो कांग्रेस। सरकारमा सहभागी पनि छ। सायद उहाँहरूलाई यस्तो लागेजस्तो लाग्यो- खाऊँ भने कान्छा बाबुको अनुहार, नखाऊ भने दिनभरिको शिकार।’
नीति तथा कार्यक्रममा केही पनि नआएकोमा विरोध गर्न कांग्रेस महामन्त्रीद्वयलाई आफ्नै पार्टी सरकारमा भएकोले गाह्रो परेको हुन सक्ने पनि उनको भनाइ छ।
‘विरोध गरौं, आफ्नै पार्टी सरकारमा छ, नगरौं मनले मानेको छैन। संसद नै छाडिदिऊ आनन्दै,’ गगन र विश्वप्रकाशलाई लक्ष्य गर्दै उनले भने।
महामन्त्री थापा स्वीट्जरल्याण्ड गएका थिए भने अर्का महामन्त्री शर्मा सगरमाथा आधार शिविर गएका छन्।
