भारत-पाकिस्तानबीच युद्धविराम भए पनि भारत प्रशासित जम्मू-कश्मिर क्षेत्रमा अझै उच्च सतर्कता अपनाइएको बताइएको छ।
चार दिनमा उत्कर्षमा पुगेको भारत-पाकिस्तान तनाव शनिबार साँझ ५ बजेदेखि अकास्मात् युद्धविराम भएपछि रोकिएको थियो।
यद्यपि जम्मू-काश्मिरको भारत-पाकिस्तान सीमा क्षेत्रमा अझै पनि उच्च सतर्कता अपनाइएको भारतीय अनलाइन हिन्दुस्तान टाइम्सले जनाएको छ। त्यहाँ सीमा सुरक्षा बललाई उच्च सतर्कता र तयारी अववस्थामा राखिएको भनिएको छ।
सीमा क्षेत्रबाट 'आतंकवादी समूह' जैश-ए-मोहम्मदका 'आतंककारी' घुसपैठ गर्ने सक्ने जोखिमलाई मध्यनजर गरेर ती क्षेत्रहरूमा उच्च सचतर्कता अपनाइएको हिन्दुस्तान टाइम्सले जनाएको छ।
शनिबार युद्धविराम भए पनि पाकिस्तानले जम्मू-कश्मिरको श्रीनगर लगायतका क्षेत्रहरूका हवाइ आक्रमण गरेको रिपोर्टहरू सार्वजनिक भएका थिए।
राति नै आकाशमा पाकिस्तानी ड्रोनहरू देखिएपछि सिमाक्षेत्रका विभिन्न ठाउँहरूमा ब्ल्याकआउट गरिएका थिए। पठानकोट, गुरदासपुर, बठिन्डा लगायत क्षेत्रमा साइरन बजाइएका थिए।
पाकिस्तानले युद्धविराम उल्लंघन गरेको आरोप लगाउँदै शनिबार नै भारतले आफ्नो प्रतिरक्षा प्रणालीहरूलाई सक्रिय गराएको थियो।
पछि पाकिस्तानका प्रधानमन्त्री शेहबाज शरिफले युद्धविरामको स्वागत गर्दै एक्समा पोस्ट गरेपछि विदेश मन्त्रालयबाट युद्धविराममा प्रतिबद्ध रहेको ब्यहोरासहितको विज्ञप्ति सार्वजनिक भएको भनेर हिन्दुस्तान टाइम्सले लेखेको छ।
आइतबार बिहान भने भारतका कुनै पनि ठाउँमा धमाकाहरू नसुनिएको र मानिसहरू आफ्नो काममा फर्किएको बताइएको छ।
भारत-पाकिस्तानबीच युद्ध रोक्ने सहमति भएको र बाँकी विषयमा वार्ता गर्ने वा अरू छलफल गर्नेबारे कुरा नभएको भारतीय सञ्चारमाध्यमहरूले जनाएका छन्।
जम्मू-कश्मिरको पहलगाममा अप्रिल २२ मा भएको आतंकवादी हमलामा पाकिस्तानको संलग्नता दाबी गर्दै भारतले 'अपरेसन सिन्दुर' सञ्चालन गरी पाकिस्तानमाथि सैन्य कारबाही सुरू गरेको थियो।
पाकिस्तानले आतंकवादी हमलामा आफ्नो संलग्ना अस्वीकार गर्दै आएको थियो। शनिबार मात्रै पाकिस्तानले पनि भारतविरूद्ध 'अपरेसन बनयान-उल-मर्सुस' घोषणा गरेर जबाफी कारबाही गरेको थियो।
दुई परमाणू हतियार सम्पन्न मुलुकहरूबीको तनाव लामो युद्धमा जाने खतरा देखिएपछि अन्तर्राष्ट्रिय शक्तिहरूले आक्रमण रोकेर संवादमार्फत समाधान खोज्न आग्रह गरेका थिए।
झन्डै एक दर्जन मुलुकहरूले भारत-पाकिस्तान तनाव रोक्न भूमिका खेलेको भनेर भारतीय सञ्चारमाध्यमहरूले लेखेका छन्।
अमेरिकी राष्ट्रपति डोनाल्ड ट्रम्पले भने अमेरिकाको लामो प्रयासपछि युद्धविराम भएको बताएका छन्।
भारतले युद्धविराम द्वीपक्षीय संवादपछि भएको बताएको छ।
-1746009348.jpg)
