परराष्ट्र मन्त्रालयले नेपाल आतंकवादको विरूद्धको लडाइँमा सबैसँग एकजुट रहेको जनाएको छ।
बिहीबार परराष्ट्र मन्त्रालयले एक विज्ञप्ति जारी गर्दै भारत-पाकिस्तान बीच जारी तनावको विषयमा नेपाल सबै खाले आतंकवादको विरूद्धमा रहेको उल्लेख गरेको छ।
‘नेपालले सबै प्रकारका आतंकवाद विरूद्धको आफ्नो दृढ अडान अनुसार तत्काल र स्पष्ट रूपमा सो बर्बर आतंकवादी हमलाको निन्दा गरेको थियो। नेपाल आतंकवादविरूद्धको लडाइँमा सबैसँग एकजुट छ,’ मन्त्रालयले जारी गरेको विज्ञप्तिमा भनिएको छ।
यस्तै नेपालले आफ्नो भूमि छिमेकी देशविरूद्ध प्रयोग गर्न नदिने पनि उल्लेख गरेको छ।
‘यो सैद्धान्तिक अडानअनुसार नेपालले कुनै पनि विरोधी शक्तिलाई आफ्ना छिमेकी राष्ट्रविरूद्ध आफ्नो भूमि प्रयोग गर्न दिने छैन,’ विज्ञप्तिमा भनिएको छ।
नेपाल दिगो शान्ति र स्थायित्वमा आफू प्रतिबद्ध रहेको पनि उल्लेख गरेको छ।
जम्मू–कश्मिरको पहलगाममा भएको आतंकवादी आक्रमणको जबाफमा भारतले बुधबार बिहानै पाकिस्तानमाथि हवाई आक्रमण गरेको थियो। उक्त आक्रमण आतंकवादको विरूद्ध बताउँदै भारतले त्यसलाई ‘अपरेशन सिन्दुर’को नाम दिएको थियो।
'अपरेसन सिन्दुर' नाम दिइएको भारतीय सैन्य कारबाही भारतीय समयअनुसार बिहान १:०५ देखि साढे १ बजेसम्म चलेको भारतले जनाएको छ।
भारतले पाकिस्तान-नियन्त्रित कश्मिरका पाँच र पाकिस्तानका चार स्थानमा आक्रमण गरेर त्यसको जबाफ दिएको छ।
-1746009348.jpg)
