गण्डकीका निलम्बित सांसद राजीव गुरूङ उर्फ दीपक मनाङेले फैसला पुनरवलोकनका लागि सर्वोच्चमा दिएको रिट फिर्ता लिएका छन्।
कात्तिक २० गते सर्वोच्च अदालतले ज्यान मार्ने कसुरमा दोषी ठहर गर्दै मनाङेलाई कैद सजाय फैसला गरेको थियो।
गुरूङले फैसला पुनरवलोकनका लागि माघ ४ गते निवेदन दिएका थिए।
पुनरवलोकनका लागि उनले दिएको निवेदन पेशी चढे पनि सुनुवाइ हुन सकेको थिएन।
उनले पुनरवलोकन रिट फिर्ताका लागि सोमबार निवेदन दिएका थिए।
उक्त निवेदनमा सुनुवाइ गर्दै बिहीबार कुमार रेग्मी, हरिप्रसाद फुयाल र तिलप्रसाद श्रेष्ठको इजलासबाट निवेदन फिर्ताको माग अनुसार नै आदेश भएको सर्वोच्चको वेबसाइटमा उल्लेख छ।
गुरूङ हाल डिल्लीबजार कारागारमा थुनामा छन्।
२०६१ वैशाख ३१ गते ‘चक्रे मिलन’ (मिलन गुरूङ) को हात छिन्ने गरी तरबार प्रहार गरेको घटनामा उनलाई सर्वोच्च अदालतले दोषी ठहर गरेको हो।
सर्वोच्च अदालतका न्यायाधीशहरू नहकुल सुवेदी र टेकप्रसाद ढुंगानाको इजलासले तत्कालीन पुनरावेदन अदालत (हाल उच्च अदालत पाटन) को फैसलालाई सदर गरेको थियो।
उनी त्यसअघि नै २ वर्ष ८ महिना जेल बसेर छुटेका थिए। त्यो अवधि घटाएर बाँकी समय उनी जेल बस्नुपर्ने कात्तिकमा फैसला भएको थियो। सो अनुसार दुई वर्ष चार महिना जेल बस्नुपर्ने भए पनि फागुन २३ गते जिल्ला अदालत काठमाडौंले उनको सजायमा २० प्रतिशत कटौती हुने आदेश गरेको थियो।
-1731390709.jpeg)
