नेकपा (एमाले) का सांसद रघुजी पन्त शिक्षा, विज्ञान तथा प्रविधि मन्त्री नियुक्त भएका छन्।
प्रधानमन्त्री केपी शर्मा ओलीको सिफारिसमा बुधबार राष्ट्रपति रामचन्द्र पौडेलले पन्तलाई शिक्षा मन्त्री नियुक्त गरेका हुन्।
विद्या भट्टराईले सोमबार शिक्षा मन्त्रीबाट राजीनामा दिएपछि उक्त पद रिक्त थियो।
साथै प्रधानमन्त्री ओलीले ऊर्जा राज्यमन्त्री पूर्णबहादुर तामाङ (कान्छाराम) लाई बर्खास्त गरेका छन्।
को हुन् उनी?
रघुजी पन्तको पृष्ठभूमि पत्रकारितासँग जोडिन्छ। उनले २०३२ सालदेखि पत्रकारिता सुरू गरेका थिए।
उनी बुधबार साप्ताहिक, छलफल साप्ताहिक, नवयुग मासिक, युगधारा (रातो) र नेपाल पत्रकार महासंघमा समेत काम गरेका थिए।
२०५१ सालमा उनी प्रधानमन्त्री मनमोहन अधिकारीका प्रेस सल्लाहकारसमेत बनेका थिए।
त्यसपछि उनी राजनीतिमा जोडिए। २०५४ सालको नेपालगञ्ज महाधिवेशनबाट उनी एमाले केन्द्रीय सदस्य बनेका थिए।
२०५६ सालमा ललितपुर क्षेत्र नम्बर ३ बाट पन्त प्रतिनिधि सभा सदस्य निर्वाचित भएका थिए।
एमालेमा उनले केन्द्रीय संस्कृति, जल तथा ऊर्जा विभाग प्रमुख भएर पनि काम गरेका थिए।
एमालेको सातौं महाधिवेशन २०५९ सालमा पनि उनी केन्द्रीय सदस्य बने। २०६१ सालमा श्रम तथा यातायात मन्त्री बनेका उनी २०६३ को पुनर्स्थापित संसदमा सदस्य थिए।
उनी पार्टीको कानुन, सामाजिक सेवा, प्रचार विभाग हुँदै हाल संस्कृति विभाग प्रमुख छन्। २०७९ मंसिरको चुनावबाट उनी समानुपातिक तर्फबाट प्रतिनिधि सभा सदस्य छन्।
