'राजसंस्था पुनर्स्थापनाका लागि संयुक्त जनआन्दोलन समिति' का संयोजक नवराज सुवेदीको घर बाहिर तैनाथ गरिएका प्रहरी हटेका छन्।
प्रहरी तैनाथी हटेपछि मंगलबारदेखि सुवेदीले संयोजक पदसमेत सम्हालेका छन्। आफ्नो घर बाहिर प्रहरी निगरानी हुन थालेको भन्दै सुवेदीले जगमान गुरूङलाई कार्यवाहक संयोजक तोकेका थिए।
गुरूङले पनि मंगलबारदेखि समितिका संयोजक सुवेदीको 'नजरबन्द' फुकेको उल्लेख गरेका छन्।
‘अब राजसंस्था पुन:स्थापना संयुक्त जनआन्दोलन समितिको संयोजकको दायित्त्व नवराज सुवेदीजीले बहन गर्नु हुनेछ। मैले राजसंस्था पुन:स्थापना संयुक्त जनआन्दोलन समिति निर्देशक समितिको प्रमुख सल्लहकार पदमा रहेर यस समितिका सम्पूर्ण अभियानलाई सफल गर्न पूर्ण सहयोग गर्नेछु,’ गुरूङले भने।
जिल्ला प्रहरी परिसरका एसपी अपिलराज बोहराले सुवेदीकै सुरक्षाका लागि प्रहरी राखे पनि हटाइसकिएको बताए।
‘उहाँलाई सुरक्षा थ्रेट होला भनेर प्रहरी राखेका थियौं, हटाइसकिएको छ,’ उनले भने।
सुवेदी नेतृत्वको समितिले तोकेका 'जनकमान्डर' दुर्गा प्रसाईंको आह्वानमा चैत १५ गते तीनकुनेमा प्रदर्शन भएको थियो। प्रदर्शन हिंसात्मक बनेको थियो भने दुई जनाको मृत्यु भएको थियो। व्यक्तिगत घर, सरकारी गाडी, जडिबुटी प्रशोधन केन्द्रमा आगजनी र तोडफोड तथा भाटभटेनीमा लुटपाट भएको थियो।
यो पनि: राप्रपा नेताहरूसँग पूर्वराजाले भने- नवराज सुवेदी र दुर्गा प्रसाईंलाई मैले अघि सारेको होइन
