नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' ले क्रान्तिकारी कम्युनिस्टहरूलाई एकता गर्ने प्रयासबाट नथाकेको बताएका छन्।
मंगलबार काठमाडौंमा आयोजित नेपाल कम्युनिस्ट पार्टीको ७७ औँ स्थापना दिवस तथा १५६ औँ लेनिन जयन्तीको अवसरमा उनले आफूहरू क्रान्तिकारी कम्युनिस्टहरूलाई एकता गर्ने प्रयासबाट नआत्तिएको बताउँदै कम्युनिस्ट आन्दोलनको एकताको झन्डा बोक्न नछाडेको बताए।
उनले क्रान्तिकारी कम्युनिस्टहरूलाई एकताबद्ध बनाउने कुरामा विमुख नभएको समेत स्पष्ट पारे।
उनले नेपालको कम्युनिस्ट आन्दोलनलाई सिङ्गै एकता गर्ने उद्देश्यले प्रयास गरिए पनि सफल हुन नसकेको बताउँदै सबै क्रान्तिकारी कम्युनिस्टहरूलाई छलफलमा आउन आग्रह गरे।
उनले छलफल र बहस गरी सही विचारको आधारमा एकीकृत र केन्द्रिकृत भएर देशमा समाजवादी क्रान्तिको यात्रा अगाडि बढाउने सङ्कल्प गर्न कम्युनिस्ट पार्टीहरूलाई आह्वान समेत गरे।
अध्यक्ष दाहालले भने, ‘क्रान्तिकारी कम्युनिस्टहरूलाई एकताबद्ध बनाउने कुरामा विल्कुल विमुख भएका छैनौँ। म सबै क्रान्तिकारी कम्युनिस्टहरूलाई जो जो, जहाँ जहाँ भए पनि सबैलाई गम्भीरताका साथ, जिम्मेवारीपूर्वक र निष्ठाका साथ म अपिल गर्न चाहन्छु, आउनुहोस् बसेर छलफल गरौँ, बहस गरौँ र एउटा सही विचारको आधारमा एकीकृत र केन्द्रिकृत भएर देशमा समाजवादी क्रान्तिको यात्रा अगाडि सङ्कल्प गरौँ। हामी सबै सोचौँ। हामीले यस सन्दर्भमा केही प्रयोगहरू गर्यौं, असफल भयौँ। हाम्रो पार्टी नै थियो, जसले नेपालको कम्युनिस्ट आन्दोलनलाई सिङ्गै एकता गरौँ भन्ने उद्देश्यका साथ निर्वाचनमा सँगै जाने र पार्टी एकता गर्ने प्रस्ताव अगाडि सारेको। तर अवसरवादका कारण सफल हुन सकेन। हामी त्यसबाट थाकेका छैनौँ, आत्तिएका पनि छैनौँ। हामी कम्युनिस्ट आन्दोलनको एकताको झन्डा बोक्न छाडेका पनि छैनौँ, छोड्न पनि छोड्दैनौँ। तर त्यो सच्चा कम्युनिस्टको एकता हुनुपर्यो, क्रान्तिकारी कम्युनिस्टको एकता हुनुपर्यो।’
अध्यक्ष दाहालले वर्तमान सरकारको जन्म अप्राकृतिक, अलोकतान्त्रिक, अपारदर्शी र असंवैधानिक रहेको आरोप दोहोर्याए।
उनले अहिलेको सरकार भ्रष्टाचारीको संरक्षण गर्न बनेको आरोप समेत लगाए।
उनले अहिलेको सरकारले राम्रो काम गर्नेलाई अपमान र आफ्नो पक्षमा अन्धो भएर लाग्नेलाई संरक्षण गरेको बताउँदै सरकारले सरकारमा बस्ने हैसियत र औचित्य गुमाइसकेको धारणा राखे।
उनले भने, ‘केपी ओली नेतृत्वको सरकारको जन्म नै अप्राकृतिक, अलोकतान्त्रिक, अपारदर्शी र असंवैधानिक छ भनेका छौँ। सरकारले गर्ने भनेकै भ्रष्टाचारीको संरक्षण गर्ने हो। यसले राम्रो काम गर्नेलाई अपनाम गर्ने र आफ्नो पक्षमा अन्धो भएर लाग्नेलाई नै जसरी पनि रक्षा गर्ने काम भएको छ। आजको दिनमा एक पनि सरकारमा बस्ने हैसियत र औचित्य सरकारले गुमाइसकेको छ।’
उनले अहिले देशको राजनीतिक अवस्था जटिल र चुनौतीपूर्ण स्थितिमा पुगेको समेत जिकिर गरे।– न्युज एजेन्सी नेपाल
