नेपाली कांग्रेसका महामन्त्री गगन थापाले १० वर्षभित्रमा नेपालीहरूलाई अहिलेकोभन्दा चार गुणा बढीले सम्पन्नशाली बनाउने बताएका छन्।
पाल्पाको पूर्वखोलामा बुधबार भएको कार्यक्रममा बोल्दै महामन्त्री थापाले अहिले अन्यौलता, नैराश्यता र आक्रोशको बीचमा रहेको नेपाली समाजलाई बाहिर निकाल्ने विश्वास दिएर अघि बढ्नुपर्ने बताए।
‘१० वर्षमा बन्छ, बनाउँछौं। यही १० वर्षभित्रमा हामीले प्राप्त गरेको राजनीतिक, आर्थिक, सामाजिक, सांस्कृतिक सबै अधिकार जोगाउँछौं र नेपालीलाई अहिलेभन्दा कम्तीमा चार गुणा बढीले सम्पन्नशाली बनाउँछौं। प्रत्येक नेपालीको आत्मसम्मान बढाउँछौं।’
नेपालीलाई पहिलेभन्दा देश अहिले बन्यो, अहिलेभन्दा भोलि झन् बन्छ भन्ने विश्वास जागृत गराउने पनि प्रेरणा प्रत्येक कांग्रेसले राख्नुपर्ने पनि थापाले बताए।
नयाँ पुस्तालाई देश बन्छ भन्ने विश्वास र भरोसा दिनुपर्ने थापाले बताए।
उनले बाँकी रहेको तीन वर्षभित्रमा सम्पन्नताको दह्रो जग हाल्ने संकल्प गर्नुपर्ने र पार्टी यसमा होमिनुपर्ने पनि बताए।
उनले नेताको आलोचना गर्न पनि आग्रह गरेका छन्। साथै नेपाल बन्छ भन्ने विश्वास जगाउन पनि आग्रह गरेका छन्।
‘नेताहरूलाई प्रश्न र आलोचना गर्नुस्, असन्तुष्टि व्यक्त गर्नुस्। तर देश गयो गयो भनेर घरमा हुर्कदै गरेको छोराछोरीलाई दिनरात भन्नु हुन्छ भने उसलाई नेपालमा नराख्न तपाईं नै जिम्मेवार हो,’ थापाले भने, ‘देशमा धेरै कुरा हुन बाँकी छ, धेरै कुरा पनि भएको छ, नेताहरूमा कमजोरी छन् सच्याउनुपर्छ तर काम गर्ने सबैले मिलेर हो।’
