उपप्रधानमन्त्रीसमेत रहेका सहरी विकास मन्त्री प्रकाशमान सिंहले संविधान संशोधन गर्दा जनताका अधिकार कटौती नहुने बताएका छन्।
गत असार १७ गते कांग्रेस-एमालेबीच संविधान संशोधनलगायत ७ बुँदे सहमति भएको थियो। त्यसतर्फ लक्षित गर्दै कतिपयले कांग्रेस-एमालेले सत्तामा पुगेर जनताका अधिकार कटौती गर्न खोजेको अभिव्यक्ति दिएकोले त्यसमा सत्यता नभएको सिंहले बताए।
‘कांग्रेस र एमालेले जनताको अधिकारका लागि लडेर आएका हुन्,’ श्री नेवा: सम्पर्क समूह रामेछापले काठमाडौंमा सोमबार गरेको कार्यक्रममा सिंहले भने, ‘जनताका अधिकार खोस्ने काम भइरहेको प्रचारमा सत्यता छैन। कांग्रेस र एमालेले जनताको अधिकार दिलाएको हो।’
उनले राजनीतिक स्थायित्वका लागि संसदका दुई ठूला दल मिलेर सरकार बनाएको पनि बताए। सरकारले जनअपेक्षाअनुसार काम गर्ने पनि उनको भनाइ छ।
