'बेपत्ता पारिएका व्यक्तिको छानबिन, सत्य निरूपण तथा मेलमिलाप आयोग (तेस्रो संशोधन) विधेयक, २०७९ माथि विचार गरियोस्' भन्ने प्रस्ताव राष्ट्रिय सभाबाट सर्वसम्मत स्वीकृत भएको छ।
आइतबार बसेको सभाको बैठकले 'प्रतिनिधि सभाबाट सन्देशसहित प्राप्त बेपत्ता पारिएका व्यक्तिको छानबिन, सत्य निरूपण तथा मेलमिलाप आयोग (तेस्रो संशोधन) विधेयक, २०७९ माथि विचार गरियोस्' भन्ने प्रस्तावलाई सर्वसम्मत स्वीकृत गरेको हो।
सरकारको तर्फबाट कानून, न्याय तथा संसदीय मामिलामन्त्री अजयकुमार चौरसियाले प्रस्तुत गरेको विधेयकमाथि राष्ट्रिय सभा सदस्यहरूले छलफल गरेका थिए।
छलफलसँगै कानूनमन्त्री चौरसियाले सांसदहरूले उठाएका प्रश्नको जबाफ दिए। लगत्तै सभामा राष्ट्रिय सभा अध्यक्ष नारायणप्रसाद दाहालले सर्वसम्मतिले स्वीकृत भएको घोषणा गरे।
राष्ट्रिय सभाको अर्को बैठक भदौ ६ गते बिहीबार सवा १ बजे बस्नेगरी स्थगित भएको छ। —न्युज एजेन्सी नेपाल
