राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन अष्ट्रेलिया प्रस्थान गरेका छन्।
प्रवक्ता मोहन श्रेष्ठले दिएको जानकारीअनुसार अष्ट्रेलियाका विभिन्न सहरहरूमा हुने कार्यक्रममा भाग लिन अध्यक्ष लिङ्देन गए राति मेलवनतर्फ प्रस्थान गरेका हुन्।
मेलवर्नमा राप्रपानिकट प्रवासी नेपाली संगठन पानस अष्ट्रेलियाको भेला छ। उक्त भेलालाई अध्यक्ष लिङ्देनले सम्बोधन गर्नेछन्। साथै त्यहाँ रहेका नेपाली समुदायसँग पनि अन्तर्क्रिया गर्ने कार्यक्रम रहेको प्रवक्ता श्रेष्ठले जानकारी दिए।
सिड्नीमा एनआरएनए, झापाली समाज अष्ट्रेलियालगायत विभिन्न संघसंस्था र नेपाली समुदायसंग भेटघाट गर्ने कार्यक्रम पनि रहेको उनले बताए।
अध्यक्ष लिङ्देन, प्रवास विभाग प्रमुख आनन्द अधिकारी र केन्द्रीय सदस्य हिक्मतजङ्ग कार्की अष्ट्रेलिया गएका हुन्।
साथै अध्यक्ष लिङ्देनले कार्यवाहक अध्यक्षको जिम्मेवारी उपाध्यक्ष बुद्धिमान तामाङलाई दिएका छन्। अध्यक्ष लिङ्देन भदौ १० गते स्वदेश फर्किने कार्यक्रम छ।
