दाङको घोराहीमा सर्प दंशबाट एक जनाको मृत्यु भएको छ।
घोराही उपमहानगरपालिका वडा नम्बर ६ गुरुवागाउँमा सर्पले डस्दा ६ वर्षिया बालिका इन्दु चौधरीको मृत्यु भएको हो।
जिल्ला प्रहरी प्रवक्ता प्रहरी नायव उपरीक्षक रामप्रसाद तिमल्सिनाका अनुसार उनकी २५ वर्षीया आमा आश्मा चौधरीको राप्ती स्वास्थ्य विज्ञान प्रतिष्ठान घोराहीमा उपचार भइरहेको छ।
गए राति करिब १ बजेतिर उनीहरूलाई घरमा सुतिरहेका बेला सर्पले डसेको थियो। सर्पले छोरी इन्दुलाई टाउकोमा र आमालाई बायाँ हातमा डसेको थियो।
उनीहरूलाई परिवारले झारफुकमा लगेका थिए। झारफुक गर्दा इन्दुलाई झन् गाह्रो भएपछि अस्पताल लगिएको थियो। बिहान ४ बजेतिर उनीहरू अस्पताल पुगेका थिए। केहीबेरमा चिकित्सकले बालिका इन्दुको मृत्यु भएको घोषणा गरेका थिए।
आमाछोरीलाई डसेको सर्पलाई बुधबार बिहान वन कार्यालयको टोलीले नियन्त्रणमा लिएको छ।
