झापाको मेचीनगर नगरपालिकामा नगर सभाकै पूर्व सन्ध्यामा नगरपालिका र राजनीतिक दलहरूबीचको विवाद अझै चर्किएको छ।
नगरपालिका नेतृत्व स्वेच्छाचारी र हैकमवादी बनेको, भ्रष्टाचार बढेको, जनप्रतिनिधि र कर्मचारीबीचको खिचातानीले विकास आयोजनाहरू अघि बढ्न नसकेको भन्दै नेपाली कांग्रेस सहितका पाँच दलले विरोध गर्दै आएका छन्।
सोमबार मेचीनगरको नगर सभा आयोजना हुँदैछ। त्यसको अघिल्लो दिन आइतबार कांग्रेस, जनता समाजवादी पार्टी (जसपा), नेकपा एकीकृत समाजवादी (एस), राष्ट्रिय प्रजातन्त्र पार्टी (राप्रपा) र राष्ट्रिय स्वतन्त्र पार्टी (रास्वपा) का नगर समितिहरूले संयुक्त विज्ञप्ति निकालेर विभिन्न बुँदामा नगरको ध्यानाकर्षण गराएका छन्।
पूर्वको सीमान्त सहर काँकडभिट्टा, धुलाबारी सहितका सहरहरू समेटिएको मेचीनगरमा मेयर गोपाल बुढाथोकी, उपमेयर मिना उप्रेतीसहित दुई-तिहाइ बहुमत सहितको एमाले जनप्रतिनिधिहरूको उपस्थिति छ। पाँच दलले नगर नेतृत्व त्यही दम्भले अघि बढेको भन्दै असन्तोष जनाउँदै आएका छन्।
'केही समयदेखि नगरपालिकाबाट भइरहेका गलत कार्यहरूले नगरवासी जोखिममा परिरहने, नगरबाट प्रदान गरिने सेवा सुविधाबाट बञ्चित हुनुपर्ने साथै जनप्रतिनिधिहरू र नगरका कर्मचारीबीचको अन्तरद्वन्द्व, खिचातानी, हैकमवाद आदिका कारण नगरको प्रशासनिक गतिविधिमा समेत अझ बढी नकारात्मक प्रभाव पर्ने भएकाले हाम्रो ध्यानाकर्षण भएको छ,' दलहरूले संयुक्त विज्ञप्तिमा भनेका छन्, 'मेचीनगर नगरपालिका वडा नम्बर ४ का वडाध्यक्षले सार्वजनिक रूपमै नगरपालिकाका सामाजिक विकास अधिकृतमाथि भ्रष्टाचारको आरोप लगाएको सन्दर्भमा नगरपालिका किन मौन रहेको? निर्दोष नपरोस्, दोषी नउम्कियोस् भन्दै नगरबासी समक्ष सत्य तथ्य सार्वजनिक गर्न माग गर्दछौं।'
त्यस्तै नगर कार्यालयले लगाएको नदीजन्य पदार्थको ठेक्काबाट नदीमा मापदण्ड विपरीत उत्खनन गरिएको खाल्डोमा डुबेर शिक्षक धनराज भण्डारीको निधन भएको भन्दै दलहरूले घटना छानबिन गर्न माग गरेका छन्।
नगर कार्यालय परिसरभित्रै सेवाग्राहीमाथि हातपात हुनु, प्रभावकारी अनुगमन नहुँदा स्कुलको सेप्टिक ट्यांकीमा डुबेर विद्यार्थीको मृत्यु हुनु, अखाद्य वस्तुहरूको उपभोग गर्न नगरबासीहरू बाध्य हुनुले नगर नेतृत्व अक्षम बनेको उनीहरूको भनाइ छ।
दलहरूले नगरपालिकाले विगतमा थालनी गरेको गौरवका आयोजनाहरू हाल ओझेलमा परेको भन्दै ती आयोजना पुनः सुरू गर्न पनि उनीहरूले माग गरेका छन्।
कांग्रेसका नगर सभापति सुवेसकुमार पनेरू, जसपाका ओमप्रकाश खापुङ, राप्रपाका विशालकृष्ण बास्तोला, रास्वपाका भिमबहादुर कुँवर र नेकपा एसका हरि तिम्सिनाले विज्ञप्तिमा हस्ताक्षर गरेका छन्।
