शिक्षा, विज्ञान तथा प्रविधि मन्त्री सुमना श्रेष्ठले संसदको रोस्टमबाटै 'अनावश्यक रूपमा शिक्षकको डिएनए परीक्षण गर्दै हिँड्ने कुरा राम्रो होइन' भन्ने अभिव्यक्ति दिएका पूर्वशिक्षा मन्त्रीसमेत रहेका नेकपा (माओवादी केन्द्र) का सांसद देवेन्द्र पौडेललाई जबाफ दिएकी छन्।
बजेटमाथि सांसदहरूले उठाएको प्रश्नमाथि आइतबारको प्रतिनिधि सभा बैठकबाट जबाफ दिँदै मन्त्री श्रेष्ठले शिक्षकहरूले राजनीति गर्न नपाउने कानुनी व्यवस्थालाई आफूले कार्यान्वयन मात्र गर्न खोजेकोले सिंगो सदनले सहयोग गर्नुपर्ने बताएकी थिइन्।
‘अब मैले कानुनी व्यवस्था कार्यान्वयन गर्न खोज्दा खुट्टा किन कमाउने? यो त यहाँहरु सबैले लेखेको, पारित गरेको कुरा हो। यसमा हामी सबैले काम गर्नुपर्छ,’ पूर्वशिक्षा मन्त्री पौडेलका अभिव्यक्तिप्रति लक्षित गर्दै मन्त्री श्रेष्ठले भनिन्, ‘कानुनको कार्यान्वयन गर्नु नै पर्छ। कानूनको कार्यान्वयन गर्दा डिएनए मात्रै होइन, आरएनए पनि परिक्षण गरौंला। फरेन्सिल ल्याब पनि यही मन्त्रालयअन्तर्गत छ। सात वटै प्रदेशमा छ, यो गर्ने हो।’
गत जेठ २९ गते प्रतिनिधि सभामै बजेटमाथिको छलफलमा भाग लिँदै सांसद पौडेलले शिक्षकको 'अनावश्यक रूपमा डिएनए परीक्षण गर्दै हिँड्ने कुरा ट्रेड युनियन अधिकार विपरीत' हुने बताएका थिए।
‘भौतिक पूर्वाधारमा सुधार, शिक्षण सिकाइमा सुधार र कानुनी सुधारमा ध्यान दिए विद्यालय सुधार हुन्छ,’ शिक्षा मन्त्री सुमना श्रेष्ठलाई लक्षित गर्दै उनले भनेका थिए, ‘मन्त्रालयको मुख्य काम भनेको शिक्षकलाई खुसी बनाउने र विद्यालयमा पुर्याउने हो। तालिम दिएर सक्षम बनाएर विद्यालय पठाउने हो।’
