राष्ट्रिय जनमोर्चाले गण्डकी प्रदेशको चलिरहेको विशेष अधिवेसन रोकेर अज्ञात रहेका आफ्ना सांसद खिमबिक्रम शाहीलाई सार्वजनिक गर्न माग गरेको छ।
जनमोर्चाकी सचेतक प्रमुख पियारी थापाले संसद सचिवालयमा बुधबार निवेदन दिँदै उक्त माग गरेकी हुन्।
प्रदेशका मुख्यमन्त्री पृथ्वीसुब्बा गुरुङविरुद्ध विपक्षी दलहरु नेपाली कांग्रेस, माओवादी केन्द्र र जनता समाजवादी पार्टीले ल्याएको अविश्वासको प्रस्तावमाथि प्रदेश सभामा छलफल भइरहेको छ।
बुधबार नै उक्त प्रस्ताव उपर मतदान गर्ने कार्यसूची छ।
अविश्वासको प्रस्तावको पक्षमा मतदान गर्ने निर्णय गरेको जनमोर्चाका सांसद शाही मतदान गर्ने बेलासम्म आइपुगेन भने उक्त प्रस्ताव फेल हुन्छ।
सचेतक थापाले दर्ता गरेको पत्रमा अज्ञात रहेका सांसद शाहीको अवस्था सार्वजनिक गर्न, जीवन रक्षा गर्न र सार्वजनिक नभए सम्मका लागि सदन स्थगित गर्न माग गरेको छ।
सभामुख नेत्रनाथ अधिकारीले सदनको कारबाही केही समयका लागि स्थगित गरेका छन्।
