नेकपा (एमाले)का अध्यक्ष केपी शर्मा ओली पार्टीको संसदीय दलको नेतामा चयन भएका छन्।
अध्यक्ष ओली आज पार्टी संसदीय दलको नेतामा सर्वसम्मत चयन भएको उनका प्रेस संयोजक चेतन अधिकारीले जानकारी दिए।
एमाले केन्द्रीय कार्यालयमा आज अध्यक्ष ओलीलाई पार्टी नेता माधवकुमार नेपालले संसदीय दलको नेतामा प्रस्ताव गरेपछि उनी सर्वसम्मत रूपमा नेता चयन भएका हुन्।
नेकपा (माओवादी केन्द्र)को समर्थनमा प्रधानमन्त्रीमा नियुक्त भएका अध्यक्ष ओलीले आजै प्रधानमन्त्रीको शपथ लिँदै छन्।
रासस
