कांग्रेस सभापति एवं प्रधानमन्त्री शेरबहादुर देउवाले नेपाली कांग्रेसको १४औँ महाधिवेशनस्थल भृकुटीमण्डपमा महाधिवेशन प्रतिनिधिहरूसँगै लाइनमा बसेर खाना खाएका छन्।
कांग्रेसको सभापतिमा उम्मेदवारी दिएका देउवाले आज भृकुटीमण्डपमा जम्मा भएका महाधिवेशन प्रतिनिधिमाझ खाना खाएका हुन्।
खानाका लागि बफेट सिष्टम र सेल्फ सर्भिसको व्यवस्था छ। उनले आफैं लाइन लागेर थालमा खाना राखेर खाएका थिए।
कांग्रेसको नेतृत्व छान्नका लागि सोमबार बिहान ८ बजेदेखि मतदान हुने जनाइएको छ।
मतदानका लागि भृकुटीमण्डप‚ महेन्द्र पुलिस क्लब र राष्ट्रियसभा गृहमा व्यवस्था मिलाइने निर्वाचन समितिले जनाएको छ। मतदान मतपत्रमार्फत गर्नुपर्नेछ।
महाधिवेशनमा महाधिवेशन प्रतिनिधिको सङ्ख्या ४ हजार ७४३ रहेको निर्वाचन समितिले जनाएको छ।
