नेपाली कांग्रेसका सभापतिसमेत रहेका प्रधानमन्त्री शेरबहादुर देउवाले पार्टीमा आन्तरिक प्रतिस्पर्धा स्वाभाविक भएको बताएका छन्।
कांग्रेसमा विभिन्न तहमा भएका अधिवेशनमा त्रिपक्षीय प्रतिस्पर्धा भइरहेका छन्। उनले पार्टीभित्र हुने आन्तरिक प्रतिस्पर्धालाई स्वाभाविक रूपमा लिन नेता तथा कार्यकर्तालाई आग्रह गरेका छन्।
आज सातै प्रदेश अधिवेशन भर्चुअल रूपमा उद्घाटन गर्दै देउवाले भने, ‘कांग्रेसलाई बलियो बनाउनु परेको छ। समृद्धिको पूर्वाधार कांग्रेसले नै खडा गरेको हो,’ उनले भने।
उनले अब स्थानीय तह लगायतको चुनाव आउन लागेकाले तयारी गर्नुपर्ने पनि बताए।
‘पार्टीलाई निर्वाचनमा विजय गराउनुपर्ने दायित्व तपाईं हाम्रो काँधमा छ,’ देउवाले भने, ‘जनताको मन जित्ने गरी रणनीति बनाउँदै काम गर्न यो अधिवेशनमा पनि छलफल होस्।’
उनले जनताको मन जित्ने गरी काम गर्न पनि पार्टीका नेता तथा कार्यकर्तालाई आग्रह गरेका छन्। उनले अब ध्यान चुनावतर्फ दिनुपर्ने पनि बताए।
